१७ माघ, वीरगञ्ज । नेपाल उद्योग वाणिज्य महासंघका अध्यक्ष चन्द्रप्रसाद ढकालले अर्थतन्त्रमा आशाको किरण देखिन थालेको बताएका छन् ।
बाराको सिमरामा आयोजित नेपाल उद्योग वाणिज्य महासंघ मधेस प्रदेश समितिको विशेष साधरण सभामा उनले रेमिट्यान्सको फिगर र पर्यटन क्षेत्रमा देखिएको सुधारले अर्थतन्त्रमा सकारात्मक योगदान दिने बताए ।
अन्तर्राष्ट्रिय मुद्रा कोष आईएमएफले भर्खरै सार्वजनिक गरेको रिपोर्टको आधारमा पनि अर्थतन्त्रमा सुधार आउँछ भनेर भन्न सकिने दावी उनको छ । ‘आईएमएफको रिपोर्टमा भारतको अर्थतन्त्रको दुई वर्षको ग्रोथ रेट ६ प्रतिशत आकलन गरिएको रहेछ । नेपाल र भारतको बीचमा पेगको फिक्स रेट छ’, उनले भने ‘त्यो हिसाबमा पनि मान्छेहरुले भने जस्तो न पाकिस्तानको जस्तो अवस्था आउन सक्छ, न श्रीलंकाको जस्तो । तर आउने दिनमा सतर्कता र संयमता भने अपनाउनु नै पर्छ ।’
