काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेको राहदानीबारे अनुसन्धान गर्न जिल्ला प्रहरी परिसर काठमाडौँमा उजुरी परेको छ । सिन्धुलीका युवराज पौडेल (सफल)ले मंगलबार काठमाडौँ प्रहरी प्रमुख (एसएसपी) दान बहादुर कार्कीलाई भेटेर उजुरी दिएका हुन् ।
सर्वोच्चको फैसला अनुसार उनले फेरि नागरिकता लिए । तर, उनको पासपोर्ट सम्बन्धी विवाद टुङ्गो लागेको छैन । २०७२ जेठ १३ मा उनले लिएको पासपोर्ट ‘विवादित’ छ । यद्यपि उनले सोमबार (माघ १५)मा सो पासपोर्ट राहदानी विभागलाई फिर्ता गरेका छन् ।
अमेरिकी नागरिक छँदै रविले लिएको भनिएको पासपोर्टबारे जिल्ला प्रहरी परिसर काठमाडौँले अनुसन्धान गरिरहेको छ । जिल्ला प्रशासन कार्यालय काठमाडौँले नागरिकतासँगै राहदानीबारे पनि छानबिन गर्न मङ्सिर १५ मा जिल्ला प्रहरी परिसर काठमाडौँलाई पत्राचार गरेको थियो । त्यसअघि नागरिकता र राहदानीबारे गृह मन्त्रालयमा उजुरी परेको थियो ।
