१८ कात्तिक, काठमाडौं । बार्सिलोनाका डिफेण्डर जेरार्ड पिकेले क्याटलान क्लबका लागि शनिवार अन्तिम खेल खेल्ने भएका छन् ।
उनले शनिबार घरेलु मैदान क्याम्प नोउमा बार्सिलोनाका लागि अन्तिम खेल खेल्दै बिदा हुने जनाएका छन् । पिकेको अन्तिम खेलमा बार्सिलोनाले ला लिगा अन्तर्गत अल्मेरियासँग खेल्नेछ ।
पिकेले बार्सिलोना छाड्ने घोषणासँगै तत्काल लागु हुने गरी सन्यास घोषणा गरेका हुन् । उनले बिहीबार भावुक भिडियो पोष्ट गर्दै आफू सधैँ बार्सिलोनाको समर्थक हुने जनाएका छन् ।
‘मैले सधैँ भन्दै आएको छु कि बार्सा बाहेक त्यहाँ अर्को कुनै टिम हुने छैन र अब पनि त्यही हुनेछ । आउने शनिबार क्याम्प नोउमा मेरो अन्तिम खेल हुनेछ,’ उनले सामाजिक सञ्जालमा भिडियो पोष्ट गर्दै भनेका छन् ।
पिकेले बार्सिलोनासँगको सम्झौता तोड्दै तलब समेत छाड्ने भएका छन् ।
३५ वर्षीय पिकेले सन् २०१८ मै अन्तर्राष्ट्रिय फुटबलबाट सन्यास लिएका थिए भने क्लब फुटबललाई निरन्तरता दिएका
थिए ।
बार्सिलोनाका लागि उनले ला लिगा, च्याम्पियन्स लिग, कोपा डेल रे, स्पानिस सुपर कप, युइएफए सुपर कप र क्लब विश्वकपको उपाधि जितेका छन् ।
१८ वर्षे खेलाडी करियरमा उनले ३५ उपाधि जितेका छन् ।
पिकेले पछिल्लो डेढ दशक विश्वकप फुटबलमा सुपर स्टारका रुपमा रहेका क्रिस्टियानो रोनाल्डो र लिओनल मेसी दुवैसँग क्लब फुटबलमा खेलेका थिए ।
