२० चैत, काठमाडौं । शहीद स्मारक ए डिभिजन लिग २०७९-८० अन्तर्गत छैटौं चरणको पहिलो दिन नेपाल एपिएफ क्लब र संकटा क्लब विजयी भएका छन् ।
च्यासल मैदानमा भएको विभागीय डर्बीमा एपिएफले नेपाल पुलिस क्लबलाई २-० ले हरायो ।
खेलको ५८ औं मिनेटमा डोम्बियाले पहिलो गोल गरे । सबिनले इन्ज्युरी समयको आठौं मिनेटमा गोल थपे ।
यस सिजन खराब खेलिरहेको पुलिसको भने यो पाँचौं हार हो । ६ खेलबाट एक अंक मात्रै रहेको पुलिस अन्तिम स्थानमा छ ।
यस्तै सातदोबाटोमा भएको खेलमा संकटाले खुमलटारलाई १–० ले हरायो । संकटाका लागि खेलको २७ औं मिनेटमा जुनियर अनगुनेले निर्णायक गोल गरे ।
यस जितपछि संकटा ६ खेलबाट ९ अंक जोडेर छैटौं स्थानमा उक्लेको छ । खुमलटार ६ अंकसहित नवौं स्थानमा छ ।
