राजनीतिक दलहरुले हालै निर्वाचन आयोगमा बुझाएको एक वर्षको आय–व्ययको विवरण निर्वाचन आयोगमा बुझाएका छन् । बुझाएको विवरणमा नेकपा (एमाले) आम्दानीको हिसाबले सबैभन्दा धनी पार्टीका रुपमा देखिएको छ ।
एमाले सबैभन्दा बढी कमाई गर्ने पार्टी बनेको छ । आर्थिक वर्षमा उसले १४ करोड ७९ लाख आम्दानी गरेको छ ।
पौने १५ करोड कमाएको एमालेले सात करोड ८५ लाख खर्च गरेको हिसाब देखाएको छ । पार्टीका पुराना कार्यकर्तासमेत रहेका भाटभटेनी मालिक मीनबहादुर गुरुङसँग झन्डै एक अर्ब दान लिएर कार्यालय भवन बनाउन लागेको यो पार्टी ६ करोड ९३ लाख बचतमा रहेको विवरणमा देखिन्छ ।
आयोगमा बुझाएको विवरणअनुसार एमालेले सदस्यता शुल्क र लेबी संकलनबाट धेरै आर्जन गरेको छ । त्यस्तै, चन्दा, प्रकाशन, विक्रि वितरणलगायतबाट पनि रकम संकलन भएको छ ।
एमालेबाट छुट्टिएर बनेको नेकपा (एकीकृत समाजवादी) चार करोड २४ लाख आम्दानीसहित दोस्रो धनी पार्टी बनेको छ । तर, महाधिवेशन, मेची–महाकाली अभियान, स्थानीय तहको उपनिर्वाचन लगायतका शीर्षकमा ४ करोड ५७ लाख खर्च हुँदा करिब ३२ लाख घाटामा रहेको हिसाब देखाएको छ ।
गएको आम निर्वाचनको केही महिनाअघि गठन भएको राष्ट्रिय स्वतन्त्र पार्टी (रास्वपा) पनि कमाइको मामिलामा अगाडि देखिएको छ । तर, सो पार्टीले आम्दानी भन्दा बढी खर्च गरेको विवरण पेश गरेको छ । जसअनुसार तीन करोड ८० लाख आम्दानी गर्दा एक वर्षमा ६ करोड ५० लाख खर्च गरेको रास्वपालाई सवा तीन करोड घाटा छ ।
मुलुककै ठूलो तथा सत्तारुढ नेपाली कांग्रेसले भने अघिल्लो आर्थिक वर्षको तुलनामा कम आम्दानी भएको विवरण पेश गरेको छ । दुई करोड ५९ लाख आम्दानी हुँदा झण्डै चार करोड खर्च गरेको कांग्रेस साढे दुई करोड घाटामा रहेको विवरणमा उल्लेख छ ।
एक करोड ८६ लाख आर्जन गरेको प्रमुख प्रतिपक्षी दल नेकपा (माओवादी केन्द्र) ले पनि घाटामा रहेको विवरण बुझाएको छ । ५३ हजार घाटा लागेको माओवादीले बताएको छ । निर्वाचन आयोगका अनुसार आयोगमा ११५ राजनीतिक दल दर्ता भए पनि ८८ वटाले मात्र वार्षिक आयव्ययको विवरण पेश गरेका छन् ।
