पुस १ गते । पर्वत बेनीमा नेपाल कम्युनिष्ट पार्टी (एमाले) जलजला गाउँपालिका कमिटीको कार्यालय स्थापना गरिएको छ । पार्टी कामलाई व्यवस्थित र प्रभावकारी बनाउन एमालेले जलजला गाउँपालिका वडा नम्बर ३ पर्वत बेनी स्थित मल्लाज चोकमा पार्टी कार्यालय स्थापना गरेको हो । हालै सम्पन्न भएको गाउँपालिका कमिटीको दोस्रो अधिवेशनबाट निर्वाचित अध्यक्ष नरबहादुर कार्कीले पार्टीका गतिविधिलाई सहज रुपमा संचालन गर्न कार्यालय स्थापना गरिएको बताउनुभयो ।
कार्यालय स्थापना भएपछि पार्टीका सम्पूर्ण गतिविधिहरु सञ्चालन गर्न सहयोग पुग्ने उहाँको भनाई छ । पार्टीका जिल्ला अध्यक्ष गोविन्द पहाडीले केही दिन अघि कार्यालयको उद्घाटन गर्नुभएको थियो । पार्टी कार्यालय उद्घाटन कार्यक्रममा जिल्ला सचिब सुवासचन्द्र पौडेलको समेत उपस्तिथि रहेको थियो ।
स्थापना भएपछि पार्टी कामकाजलाई व्यवस्थित बनाउने र जनता सँगको सम्बन्धलाई सुदृढ बनाउँदै जलजलामा नेकपा एमालेलाई बलियो शक्तिका रुपमा स्थापित गर्ने विश्वास व्यक्त गर्नुभयो । गण्डकी प्रदेश कमिटीका सदस्य एवम् जलजला इन्चार्ज लालबहादुर अधिकारीले आगामी दिनमा पार्टीका सम्पूर्ण गतिविधिहरु पार्टी कार्यालयबाट सञ्चालन हुने बताउनुभयो । कार्यालय स्थापना भएपछि पार्टीसँग सम्बन्धित अभिलेखहरु सुरक्षित राख्न,पार्टी कार्यकर्ता र जनतासँगको सम्बन्धलाई जिवन्त राख्न सहयोग पुग्ने उहाँले आशा व्यक्त गर्नुभयो । गाउँपालिका कमिटीको अधिवेशन सम्पन्न भएसँगै नेकपा एमाले जलजला वडा अधिवेशनमा जुटेको सचिव निलकण्ठ सुवेदीले बताउनुभयो ।
