इस्लामावाद । पाकिस्तानमा आम चुनाव सम्पन्न भएको तीन दिनपछि निर्वाचन आयोगले राष्ट्रिय र प्रान्तीय सभाको करिब सबै नतिजा घोषणा गरेको छ । नतिजाअनुसार स्वतन्त्र उम्मेदवारहरूले १०१ सीट जितेका छन् । यीमध्ये ९३ सीटमा पूर्वप्रधानमन्त्री इमरान खानको दल पाकिस्तान तहरीक–ए–इन्साफ पार्टीले समर्थन गरेका उम्मेदवारहरु विजयी भएको बीबीसी हिन्दीले उल्लेख गरेको छ ।
खैबर पख्तुनख्वा प्रान्तीय सभामा पीटीआई समर्थित उम्मेदवारहरू सरकार बनाउने स्थितिमा छन् । ११५ सिट भएको सदनमा ९० सिट जितेका छन् । यहाँ जमियत उलेमा–ए–इस्लाम सात सिटसहित दोस्रो र पीएमएलएन पाँच सिटसहित तेस्रो दल बनेको छ ।
बलुचिस्तान विधानसभा
बलुचिस्तान विधानसभाको ५१ मध्ये ५० सिटको नतिजा सार्वजनिक भएको छ । निर्वाचन आयोगका अनुसार पीपीपी र जमियत उलेमा–ए–इस्लामले ११/१ सिट जितेका छन् भने पीएमएल (एन)ले १० सिट जितेका छन् । यहाँ ६ स्वतन्त्र उम्मेदवारले पनि जित हासिल गरेका छन् । अवामी पार्टीले चार र नेशनल पार्टीले तीन सिट पाएका छन् ।
पाकिस्तानको पञ्जाब प्रान्तको लाहोर सहरमा इमरान खानको पार्टी पीटीआईले प्रस्तावित विरोध प्रदर्शनलाई मध्यनजर गर्दै कडा सुरक्षा व्यवस्था गरिएको छ । निर्वाचनमा धाँधली भएको आरोप लगाउँदै पीटीआईले दिउँसो २ बजेदेखि शान्तिपूर्ण प्रदर्शनको घोषणा गरेको थियो ।
