२२ वैशाख, चितवन । भरतपुरमा सत्ता गठबन्धनको आमसभा भइरहेको छ । सभामा शुभकामना मनतव्य दिने क्रममा नेपाली कांग्रेस चितवन जिल्लाका निवर्तमान सभापति जीतनारायण श्रेष्ठले भरतपुर महानगरबाट रेणु दाहाललाई जिताएर पठाऔं तर माओवादी केन्द्रका अध्यक्ष पुष्पकमल दाहाल प्रचण्डले धोका नदिन आग्रह गरेका छन् ।
आमसभामा मन्तव्य दिने क्रममा उनले प्रचण्डलाई विगतमा जस्तो धोका नदिन आग्रह गरेका हुन् ।
‘हाम्रो सोझो सभापति जे भन्यो त्यही गर्नुहुन्छ, भोलिका दिनमा ढाँट्ने काम धोका दिने काम नहोस्,’ उनले भने, ‘जे प्रतिवद्धता पाँच वर्षअघि गरेका थियौं, त्यो तीन महिनापछि टुट्यो ।’
उनले गठबन्धनका उम्मेदवारलाई भरतपुरमा कांग्रेसले एक ढिक्का भएर जिताउने पनि बताए । पहिले पार्टीले निर्णय नगर्दासम्म आफूहरुको केही गुनासो भए पनि पार्टीले निर्णय गरेपछि एकढिक्का भएर लाग्ने उनले बताए ।
