१३ वैशाख, काठमाडौं । २०७९ बै्रशाख ३० गते हुन गइरहेको स्थानीय तहको निर्वाचनमा प्रमुख तथा अध्यक्ष पदमा स्वतन्त्र उम्मेद्वारहरुको दावेदारी अत्यधिक बढी देखिएको छ । प्रमुख र उपप्रमुख पदमा स्वतन्त्र उम्मेद्वारीको संख्या निकै ठूलो छ भने अरु पदमा एमालेको मनोनयन संख्या बढी देखिन्छ ।

यसमा एकीकृत समाजवादीको मनोनयन निकै नगन्य देखिन्छ । देशभरबाट मनोनयनको विवरण संकलन र अद्यावधिक हुने क्रम जारी भएकाले अन्तिम विवरणमा भने केही फरक पर्नसक्ने देखिन्छ ।

यस्तै नगरपालिकाहरुको उपप्रमुख पदमा पनि प्रमुखकै हाराहारीमा मनोनयन दर्ता भएको छ । उपप्रमुख पदमा समेत स्वतन्त्रत उम्मेद्वारहरुको संख्या बढी छ । त्यसपछि एमाले, कांग्रेस र माओवादी केन्द्र छन् । तालमेलका क्रममा कांग्रेसले प्रमुख पद दावी गरेका कतिपयमा माओवादी केन्द्रले उपप्रमुख पाएकाले चौथो क्रममा माओवादी केन्द्र परेको छ ।

गाउँपालिकाहरुको अध्यक्ष पदमा समेत स्वतन्त्र र त्यसपछि एमाले अगाडि देखिएको छ । त्यसपछि कांग्रेस, माओवादी केन्द्र लगायतका दल छन् ।

गाउँपालिकाको उपाध्यक्ष पदमा एमाले सबैभन्दा अगाडि देखिन्छ । त्यसपछि स्वतन्त्र उम्मेद्वारहरुको मनोनयन परेको छ । नेपाली कांग्रेस तेस्रो स्थानमा छ ।

देशभरका गाउँपालिका र नगरपालिकाको वडाध्यक्ष पदमा एमाले र त्यसपछि नेपाली कांग्रेसको उम्मेद्वारी परेको छ । त्यसपछि स्वतन्त्र उम्मेद्वार अनि माओवादी केन्द्र छन् ।

हरेक वडामा दुई जनाका दरले रहने वडा सदस्य पदमा सबैभन्दा बढी उमेद्वारी परेको छ ।

महिला वडा सदस्यमा पनि एमालेको उम्मेद्वारी बढी देखिन्छ । त्यसपछि कांग्रेस र माओवादी केन्द्र परेका छन् ।

अनुपातका हिसाबले सबैभन्दा कम उम्मेद्वारी परेको दलित महिला वडा सदस्य पदमा करिव तेब्बरको हाराहारीमा उम्मेद्वारी परेको देखिन्छ ।