३० वैशाख, काठमाडौं । कर्णाली सरकारका दुई मन्त्रीले हिजो पदबाट राजीनामा दिएको अर्को मन्त्रालय फुटाएर नियुक्त गरिएका तीन मन्त्रीको सफद रोकिएको छ । आज बिहान ११ बजेका लागि तोकिएको कर्णालीका तीन नवनियुक्त मन्त्रीहरुको पद तथा गोपनीयताको सपथ ग्रहण रोकिएको छ । सत्तासांझेदारी तीन पार्टीबीच कुरा नमिलेपछि मन्त्रीको सपथ कार्यक्रम रोकिएको हो ।
हिजो मुख्यमन्त्रीको कार्यालयले विन्दमान बिष्टलाई आन्तरिक मामिला तथा योजना मन्त्रालय, सीता नेपालीलाई भौतिक विकास मन्त्रालय फुटाएर उर्जा तथा जलश्रोत मन्त्रालय र गोपाल शर्मालाई आर्थिक मामिला तथा योजना मन्त्रालयको जिम्मेवारी दिएको थियो ।
आर्थिक मामिला तथा योजना मन्त्री विमला केसी र आन्तरिक मामिला तथा कानून मन्त्री नरेश भण्डारीले राजीनामा दिएपछि माओवादी केन्द्रकै ३ सांसदलाई मन्त्रालयको जिम्मेवारी दिइएको हो । नवनियुक्त मन्त्रीहरुको बुधबार नै हुने भनिएको सपथ कार्यक्रम विहिबार बिहानका लागि सारिएको थियो । तर, बिहिबार पनि सपथ ग्रहण कार्यक्रम हुन
सकेन् ।
मुख्यमन्त्री महेन्द्रबहादुर शाहीले गत वैशाख ३ गते विश्वासको मत हासिल गरेयता दोस्रो पटक मन्त्रिपरिषद् हेरफेर गरेका हुन् । मन्त्रिपरिषद् पुनर्गठनमा लागेका मुख्यमन्त्री शाही एक मन्त्रालय थपेर ८ मन्त्रालय बनाउने तयारीमा छन् । सोहीअनुसार सबै मन्त्रालयमा छिट्टै मन्त्री नियुक्त गर्ने उनको तयारी छ ।
वैशाख ३ गते नेकपा एमालेका ४ सांसदले ह्वीप उल्लंघन गर्दै मुख्यमन्त्री शाहीको पक्षमा मतदान गरेपछि शाही नेतृत्वको सरकार जोगिएको थियो । विश्वासको मत पाएसँगै शाहीले ह्वीप उल्लंघन गरेर एमालेको कारवाहीमा परेकामध्ये ३ जनालाई मन्त्री समेत बनाइसकेका छन् भने विश्वासको मत दिने नेपाली काँग्रेसलाई तत्कालका लागि सामाजिक विकास मन्त्रालयको जिम्मा दिइएको छ । तर, मन्त्री नियुक्ति भने गरिएको छैन ।
काँग्रेसले कसलाई मन्त्री बनाउने भन्ने अझै टुंगो लगाउन सकेको छैन । शुक्रबारभित्रै काँग्रेसको भागमा परेको सामाजिक विकास मन्त्रीको टुंगो लगाएर एकसाथ सबै मन्त्रीको सपथ गराउने तयारीमा प्रदेश सरकार रहेको श्रोतको दाबी छ ।
