काठमाडौँ । काठमाडौँको गोकर्णेश्वर नगरपालिका–८ स्थित माकलबारीमा एक लाख लेनदेनको विवादमा एक युवकको हत्या भएको छ ।
माकलबारीमा संचालित आरके मोटरसाइकल वर्कसपमा १९ वर्षीय राहुल साहको हत्या भएको हो ।
हत्यामा संलग्न आरोपमा प्रहरीले वर्कसप सञ्चालकसहित ६ जनालाई पक्राउ गरेको छ ।
गोकर्णेश्वरको बाहुनधारा बस्ने साह चैत ११ देखि सम्पर्क बिहीन थिए । चैत १५ मा हत्या गरेर वर्कसप पछाडिको जमिनका गाडेको अवस्थामा शव भेटिएको थियो ।
हत्यामा संलग्न आरोपमा पक्राउ पर्नेमा वर्कशप सञ्चालक सर्लाही घर भएका २२ वर्षीय निप मण्डल, १८ वर्षीय बिजय यादव, १८ वर्षीय करन कुमार महतो, २३ वर्षीय जोधन मण्डल, ४५ वर्षीय उत्तम मण्डल र भारत घर भएर दक्षिणढोका बस्ने २९ वर्षीय सुनिल शर्मा छन् ।
१ लाख १० हजार रुपैयाँ लेनदेन विवादमा उनको हत्या भएको अनुसन्धानमा संलग्न एकजना अधिकृतले जानकारी दिए ।
साहले ग्यारेज सञ्चालक मण्डलसँग रकम लिनुपर्ने थियो । रकम लिन उनी वर्कसपमा पुग्छन् । मण्डलले पैसा दिन आनाकानी गरेपछि ‘पैसा नलिई जान्न’ भन्दै साह घण्टौँ वर्कसपमा बसेपछि उनीहरूको बिचमा विवाद भएको अनुसन्धानमा संलग्न एकजना अधिकृतले बताए ।
ती अधिकृतले भने, ‘साहले पैसा नलिई नजाने अडान राखेसँगै वर्कसपका कामदार र बाहिरबाट समेत थप व्यक्ति बोलाएर हत्या गरेको देखिन्छ ।ु
हत्यामा संलग्न निपु, विजय र करन मुख्य आरोपी हुन् । जोधन मतियारको रूपमा देखिएको अनुसन्धानबाट खुलेको प्रहरीको भनाइ छ ।
