१४ कात्तिक, काठमाडौं । अखिल नेपाल फुटबल संघ (एन्फा) ले एएफसी मेम्बर एसोसिएसन अफ दि इअर अवार्ड प्राप्त गरेको छ ।
एएफसीले वार्षिक अवार्ड कार्यक्रममा मंगलबार एन्फालाई गोल्ड क्याटेगोरी अन्तर्गत मेम्बर एसोसिएसन अफ दि इअर अवार्ड प्राप्त गरेको एन्फाले जनाएको छ ।
एएफसी मेम्बर एसोसिएसन अफ दि इअर अन्तर्गत प्लाटिनम क्याटेगोरीको अवार्ड जापान फुटबल संघ र डायमण्ड क्याटेगोरीको अवार्ड थाइल्याण्ड फुटबल संघले प्राप्त गर्यो । यस्तै रुबी क्याटेगोरीको अवार्ड लाओस फुटबल संघले
पायो ।
एन्फाले भने फिफा र एएफसीको सिद्धान्तहरू अनुरूप आफ्नो विधान र संहिता विकास गरी सुशासनको उच्चतम स्तर कायम गरेकाले अवार्ड प्राप्त गरेको जनाएको छ ।
एएफसीको वार्षिक अवार्ड कार्यक्रममा वर्षको उत्कृष्ट खेलाडी प्रशिक्षक लगायत विभिन्न अवार्ड वितरण गरिएको थियो ।
कतारका अक्रम अफिफले पुरुषतर्फ एएफसी प्लेअर अफ दि इअर अवार्ड पाए भने महिलातर्फ जापानकी किको सेइकेले अवार्ड प्राप्त गरिन् । यस्तै एएफसी कोच अफ दि इअर पुरुषतर्फ जापानका गो ओइवा तथा महिलातर्फ दक्षिण कोरियाका पार्क योङ जोउङले पाए ।
फिफा अध्यक्ष जियानी इन्फान्टिन्होलाई एएफसी डायमण्ड अफ एसिया सम्मान प्रदान गरियो । एएफसी एसियन कप होस्ट अप्रेसिएसन अवार्ड कतार फुटबल संघ र एएफसी प्रेसिडेन्ट रिकगनिसन अवार्ड फर आउटस्ट्यान्डिङ कन्ट्रिबुसन साउदी अरेबियन फुटबल महासंघलाई प्रदान गरियो ।
