असार ६, पर्वत । पर्वत जिल्लाको जलजला गाउँपालिकाले आगामी आर्थिक वर्ष २०८१/०८२ का लागि ५० करोड ४ लाख १३ हजारको बजेट सार्वजनिक गरेको छ ।
पर्वत बेनीमा शुरु भएको सत्रौ गाउँसभामा जलजला गाउँपालिकाका उपाध्यक्ष दिपक आचार्यले संघीय, प्रदेश सरकारको अनुदान, आन्तरिक आम्दानी र चालु आर्थिक वर्षमा खर्च हुन नसक्ने अनुमानित रकमलाई आधार बनाएर बजेट सार्वजनिक गरेका हुन् ।
गाउँपालिकाका अध्यक्ष राजुप्रसाद आचार्यले प्रस्तुत गर्नुभएको नीति तथा कार्यक्रम पारित भएपछि उपाध्यक्षले बजेट प्रस्तुत गर्नुभएको थियो । नीति तथा कार्यक्रम र बजेट सर्वसहमतिमा पारित भएको छ ।
विगतका वर्षमा जनप्रतिनिधीहरुबीचको किचलोका कारण तनावग्रस्त हुने जलजलाको गाउँसभा यसपाली शान्त वातावरणमा शौहार्दपूर्ण रुपमा सम्पन्न भएको हो । संघीय सरकारबाट ४३ करोड १९ लाख ३ हजार र प्रदेश सरकारबाट २ करोड ८२ लाख ७२ हजार अनुदान पाएको जलजलाले ४ करोड २ लाख ३८ हजार आन्तरिक आम्दानी गर्ने महत्वाकाक्षी लक्ष्य राखेको छ ।
चालु आर्थिक वर्षको चालुतर्फ ७२.४ र पुजिगत तर्फ ५८ं३८ प्रतिशत तथा समग्रमा ६८.४२ प्रतिशत बजेट खर्च गरेको हो । आगामी वर्ष प्रशासनिक शिर्षकमा नौ करोड पचास लाख बिनियोजन भएको छ ।
पुजिगत शिर्षकमा सबैभन्दा धेरै गण्डकी गोपाल गौशालालाई २ करोड ९० लाख, लस्ती बास्बोट गौशाला सडकलाई १ करोड, शितभण्डार निर्माण तथा व्यवस्थापनका लागि १ करोड, कर्मचारी आवास, स्टोर र भैपरी बिबिध शिर्षकमा १ करोड ५० लाख, बेनी भुर्तुला सडकलाई ३० लाख, सल्यान अम्लाए नाथिमारे सडकलाई २२ लाख बिनियोजन भएको छ ।
युवा तथा खेलकुदमा १ रकोड बयाली लाख तीस हजार, वडा विकास कार्यक्रमलाई ५२ लाख, स्वास्थ्यलाई ४६ लाख ३० हजार, पशु सेवामा ४० लाख, कृषि तथा सहकारीमा ६२ लाख, २५ हजार, चिस्यानगृह निर्माण तथा सञ्चालन गर्न ६० लाख बिनियोजन भएको छ ।
९ वटा वडा कार्यालयहरुले सिफारिस गरेका योजनाहरुका लागि ४ करोड ७० लाख बिनियोजन भएको छ । गाउँसभाको अवसरमा जलजला गाउँपालिकाको लोगो पनि सार्वजनिक गरिएको प्रमुख प्रशासकीय अधिकृत फणिन्द्रप्रसाद आचार्यले बताए।
