१५ जेठ, काठमाडौं । कन्नड टेलिभिजनकी चर्चित अभिनेत्री मेबिना माइकलको २२ वर्षको उमेरमा सडक दुर्घटनामा परी मृत्यु भएको छ ।
लोकप्रिय टिभी रियालिटी शो ‘प्याते हुडुगिर हाल्ली लाइफ’ की बिजेता मेबिनाको दुर्घटना नागमङ्गला तालुकको देवहल्लीमा भएको थियो । उनी मंगलबार आफ्नो गृहनगर मडिकेरी गइरहेका बेला दुर्घटना भएको भारतीय सञ्चार माध्यमले बताएका छन् ।
इन्डिया टुडे डट इनको रिपोर्ट अनुसार मेबिना आफ्ना साथीहरुसँग घर फर्किरहेका बेला बाटोमा उनको कार एउटा ट्र्याक्टरसँग ठोक्किएको थियो । रियालिटी शोका होस्ट तथा नायक अकुल बलाजीले मेबिनाको मृत्युमा शोक व्यक्त गर्न ट्वीटरको सहारा लिएका छन् ।
मलाई मनपरेकी प्रतियोगी र प्याते हुडुगिर हाल्ली लाइफकी बिजेता मेबिनाको अचानक मृत्युको खबर सुनेर आहत छु । मेबिना निकै सानी थिइन् र हँसीमजाक गर्नुपर्ने व्यक्तित्व थियो उनको, म यो कुरामा अझै पनि विश्वास गर्न सकिरहेकी छैन कि मेबिना अब यो दुनियाँमा छैनन् । यो दुर्घटनाबाट बाहिर निस्कनका लागि उनको परिवारसँग मेरो प्रार्थना छ ।
