१० चैत, काठमाडौं । रुसको राजधानी मस्कोमा आयोजित कन्सर्टमा हमला हुँदा १३३ जनाले ज्यान गुमाएका छन् । सन् २००४ पछि रुसमा हमलामा ज्यान गुमाउनेहरुको यो नै ठूलो संख्या हो । सन् २००४ मा एक स्कुलमा हमला हुँदा करिब ३०० जनाले ज्यान गुमाएका थिए ।
राजधानी मस्कोमा कन्सर्टमा जम्मा भएका भीडलाई निशाना बनाउनेमध्ये चार संदिग्ध व्यक्ति पक्राउ गरिएको रुसी सुरक्षा अधिकारीहरुले बताएका छन् । घटना लगत्तै राष्ट्रका नाममा सम्बोधन गर्दै रुसी राष्ट्रपति भ्लादिमिर पुटिनले अपराधीहरुलाई नछोड्ने प्रतिवद्धता व्यक्त गरेका छन् ।
मुलुकलाई रक्तपातबाट सुरक्षित गर्न सुरक्षामा विशेष ध्यान दिइने उनले बताएका छन् । यो हमला मुलुकलाई विभक्त बनाउने प्रयासमा भएपनि यसबाट विचलित नहुने उनको पुटिनले बताएका छन् ।
