काठमाडौँ । नेपाली कांग्रेसले एक महिने ‘समुदायमा कांग्रेस’ अभियान सञ्चालन गर्ने भएको छ । शुक्रबार पार्टी कार्यालय सनेपामा बसेको कार्यसम्पादन समितिको बैठकले एक महिने अभियान सञ्चालन गर्ने निर्णय गरेको हो ।
अभियानका लागि ७७ वटै जिल्लामा प्रतिनिधि खटाउने कांग्रेसले जनाएको छ । साउनमा बसेको केन्द्रीय समिति बैठकले भदौ १० देखि २४ सम्म ‘समुदायमा कांग्रेस’ अभियान गर्ने निर्णय गरेको थियो । स्थगित भएको उक्त अभियानमा अब पार्टी संगठन र नागरिकसँग जोडिने दुवै कार्यक्रम हुने छ ।
महामन्त्री थापाका अनुसार मंसिर १२ देखि बोलाइएको केन्द्रीय समिति बैठक मूलभूत रुपमा सरकारको काम कारबाहीमा केन्द्रित रहने छ । बैठकमा कांग्रेसबाट मन्त्री भएकाहरुले यो अवधिमा भएका मन्त्रालयगत कार्यको जानकारी बैठकमा राख्ने छन् । कांग्रेसबाट केन्द्रीय सरकारमा ८ जना मन्त्री छन् ।
बैठकले साउन १० मा सार्वजनिक वार्षिक क्यालेण्डर परिमार्जन गर्ने निर्णय गरेको छ । वार्षिक क्यालेण्डर परिमार्जनको जिम्मेवारी महामन्त्री थापाले पाएका छन् ।
