१६ कात्तिक, काठमाडौं । साविक विजेता म्यानचेष्टर युनाइटेड इएफएल कपक फुटबलको चौथो चरणबाटै बाहिरिएको छ । यस्तै आर्सनल पनि बाहिरिंदा चेल्सी र लिभरपुल भने क्वाटरफाइनल पुगेका छन् ।
बुधबार राति भएको खेलमा घरेलु मैदानमै न्युकासल युनाइटेडसँग ३-० ले पराजित भएपछि युनाइटेड बाहिरिएको हो ।
ओल्ड ट्राफोर्डमा भएको खेलमा न्युकासलका लागि मिगुएल अल्मिरवनले २८औं, लेविस अलले ३६औं र जोसेफ विल्लकले ६०औ मिनेटमा गोल गरे ।
चेल्सीले ब्ल्याकवर्न रोभर्सलाई २-० ले हराएर क्वाटरफाइनलमा स्थान बनाएको हो । चेल्सीका लागि बाडपएसिलेले ३०औं र रहिम स्टर्लिङले ५९औं मिनेटमा गोल गरे ।
यस्तै लिभरपुलले बर्नमाउथलाई २-१ ले हराएर क्वाटरफाइनलमा स्थान बनायो । लिभरपुलका लागि कोडी गाक्पो र डार्विन नुनेजले एक एक गोल गरे । लिभरपुलले अब क्वाटरफाइनलमा वेष्टहम युनाइटेडसँग खेल्नेछ ।
वेष्टहमले आर्सनललाई ३-१ ले हराएर अन्तिम आठमा स्थान बनाएको हो । हारपछि आर्सनल भने प्रिक्वाटरफाइनलबाटै बाहिरिएको छ ।
