काठमाडौँ । चालु आर्थिक वर्षको १० महिनासम्म आइपुग्दा मुलुकको शोधनान्तर स्थिति सवाँ २ खर्ब हाराहारी बचतमा पुगेको छ । नेपाल राष्ट्र बैङ्कका अनुसार वैशाख मसान्तसम्म मुलुकको ब्यालेन्स अफ पेमेन्ट (बीओपी) २ खर्ब १४ अर्ब ६७ करोडले बचतमा रहेको हो ।
यस्तै गत आर्थिक वर्षको तुलनामा यस वर्ष मुलुकको चालु खाता घाटामा समेत सुधार आउँदै ५४ अर्ब ६७ करोड रुपैयाँमा झरेको केन्द्रीय बैङ्कले जनाएको छ । आर्थिक वर्ष २०७८/७९ को वैशाख मसान्तसम्म मुलुकको चालु खाता ५ खर्ब ४५ अर्ब ६ करोडले घाटामा रहेको थियो । यस्तो घाटा अघिल्लो वर्ष अमेरिकी डलरमा ४ अर्ब ५५ करोड रहेको थियो ।
समीक्षा अवधिमा पुँजीगत ट्रान्सफर २०.५ प्रतिशतले कमी आई रु.६ अर्ब ३६ करोड कायम भएको छ भने खुद प्रत्यक्ष वैदेशिक लगानी ४ अर्ब ३६ करोड रुपैयाँ मात्र आएको छ । अघिल्लो वर्षको सोही अवधिमा पुँजीगत ट्रान्सफर ७ अर्ब ९९ करोड रुपैयाँ र खुद प्रत्यक्ष वैदेशिक लगानी १६ अर्ब ६५ करोड रहेको थियो ।
२०८० वैशाख महिनामा अन्तर्राष्ट्रिय मुद्रा कोषबाट एक्स्टेन्डेड क्रेडिट फसिलिटी अन्तर्गत दोस्रो किस्ता बापतको ६ अर्ब ८८ करोड रुपैयाँ (अमेरिकी डलर ५ करोड २७ लाख) प्राप्त भएको राष्ट्र बैङ्कले जनाएको छ ।
