काठमाडौँ । नक्कली भुटानी शरणार्थी प्रकरणका मुख्य योजनाकार मध्येका एक इन्द्रजित राई बयान नै नदिइ हिरासतमा फर्किएका छन् । आइतबार जिल्ला अदालत काठमाडौँमा राईलाई बयानका लागि उपस्थित गराइएपनि ‘स्वास्थ्यमा समस्या रहेको’ भन्दै उनले बयान दिन चाहेनन् । दिनभर इजलासमै कहिले पत्रिका पढ्ने र कहिले आफ्ना वकिलसँग छलफल गरेर समय बिताएका उनले सुरुमा न्यायाधीश प्रेमप्रसाद न्यौपानेलाई भने, ‘श्रीमान सञ्चो छैन, टी ब्रेकपछि बयान दिन्छु ।’
प्रहरी हिरासतमा हुँदा पनि उनले बयान दिन त्यस्तै आनाकानी गरेको प्रहरी अधिकारीहरु बताउँछन् ।
आइतबारसम्म यो प्रकरणमा ५ जनाको बयान सकिएको छ । अदालतमा शुक्रबार र आइतबार दुई दिनमा लक्ष्मी महर्जन, टंक कुमार गुरुङ, सन्दीप रायमाझी, सागर राई र केशव प्रसाद दुलालको बयान सकिएको छ । यो प्रकरणमा ३० जनालाई मुद्दा चलाइएको भएपनि १७ जनामात्रै पक्राउ परेका छन् ।
