प्रधानमन्त्री पुष्पकमल दाहाल प्रचण्डले संसदको आजको बैठकमा विश्वासको मत माग्दै बोल्ने क्रममा सहकार्यको राजनीतिका लागि आफूलाई विश्वासको मत दिन आग्रह गरेका छन्।
प्रतिनिधि सभामा विश्वासको मत माग्दै प्रधानमन्त्री प्रचण्डले सहमति, सहकार्य र आपसी विश्वासको राजनीतिलाई अघि बढाउनका लागि विश्वासको मत दिन अपिल गरेका हुन्।
‘निषेधको होइन, सहमति सहकार्य र आपसी विश्वासमा राजनीतिलाई अघि बढाउनका लागि विश्वासको मत दिन म आग्रह गर्दछु,’ प्रचण्डले भने, ‘सामाजिक न्याय र सुशासनका लागि विश्वासको मत माग्न उभिएको छु।’
पहिलो पटक प्रधानमन्त्री हुँदा सिक्दासिक्दै राजीनामा दिनुपर्ने परिस्थिति आएको भन्दै प्रचण्डले दोस्रो कार्यकाल पनि उतारचढावमै वितेको उनले बताए।
अबको कार्यकाल सुशासनमा केन्द्रित हुने उनले बताए।
‘यसपटक फरक संकल्पका साथ संसदमा उभिएको छु। विश्वासको मत पाएमा म इमान्दार स्वीकारोक्तिका साथ सुरु गर्न चाहन्छु,’ उनले भने।
प्रचण्डलाई सत्ता साझेदार ७ दलसहित नेपाली कांग्रेस, एकीकृत समाजवादी र लोसपासहितका दलले विश्वासको मत दिने निर्णय गरेका छन्।
