प्रमुख प्रतिपक्ष दल नेकपा एमालेका अध्यक्ष केपी शर्मा ओलीले पार्टीनिकट उद्योगी व्यवसायीको भेलामा आज बोल्दै क्रममा अहिलेको सरकार ढाल्नतर्फ एमाले नलाग्ने बताएका छन्।
‘अहिलेको गठबन्धन सरकार कहिलेसम्म चल्छ यो कुहिइसकेको छ,’ ओलीले भने, ‘कुहिएको फल पनि कुहियो भन्नेवित्तिकै झर्दैन, झर्नलाई मज्जाले कुहिनुपर्छ। यो झर्नेतर्फ जाँदैछ। झर्ने समय हामीले पर्खनुपर्छ।’
‘यो सरकार ढाल्न हामी कोसिस नै गर्दैनौं। ढालेको बात पनि नलागोस्,’ उनले भने, ‘यो आफैँ झरोस्, कुहिएर फतक्कै झरोस्।’
एमालेले अहिले सरकारतिरभन्दा पनि चुनावमा ध्यान दिइरहेको बताए। अहिलेको सरकार ढलेन भने देशलाई बरबादीतर्फ लैजाने पनि बताए।
‘यो सरकार तुरून्तै ढलेन भने, जतिदिन रहन्छ देशलाई बरबादीतिर धकेल्छ,’ ‘प्रहरी भाइहरूले झुक्किएर ताली हान्नुहोला फेरि। देश बनाउन सबैलाई परेको छ। सबैलाई समस्या छ। कसैलाई ताली बजाउन मिल्छ कसैलाई मिल्दैन तर भोट हाल्न सबैलाई मिल्छ।’
