नेकपा माओवादी केन्द्र नेता रामचन्द्र झाले माओवादी छाडेर एमाले अध्यक्ष केपी शर्मा ओलीको प्रवृत्तिविरुद्ध लड्न नेकपा एकीकृत समाजवादी पार्टी रोजेको बताएका छन् । झाले माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालसँग सल्लाह गरेर नै आफूले माओवादी केन्द्र छाडेर नेकपा एकीकृत समाजवादीमा प्रवेश गर्ने निधो गरेको बताए ।
‘माओवादी केन्द्रमा रहेर ओली प्रवृत्तिका विरुद्ध लड्न सकिँदैन, ओलीसँग लड्नका लागि एमालेबाट अलग हुनुभएका माधवकुमार नेपालकै साथमा रहेर मात्र सम्भव हुन्छ ।’
आफू एमाले पार्टीमा रहेर लामो समय काम गरेको र सबैलाई बुझेकाले पनि नेकपा एकीकृत समाजवादीमा रहेर काम गर्न सजिलो हुने उनको भनाइ थियो । माओवादी केन्द्रका अध्यक्ष प्रचण्डले पार्टीकै बैठकमै ‘रामचन्द्र झाले पार्टी छाड्न थाल्नु भएको छ, उहाँलाई सबैजनाले शुभकामना दिनुस्’ भनेको सुनाउँदै झाले आफू माओवादी केन्द्रका अध्यक्ष प्रचण्डलगायत अन्य नेताहरुसँग बिदा भइसकेको बताए ।
‘अन्ततः एक न एक दिन माओवादी केन्द्र र नेकपा एकीकृत समाजवादीबीच एकीकरण हुने निश्चित छ, अहिले सुरुमा गठबन्धन वा मोर्चा बनाएर सँगै जाने कुरा भएको छ, पछि एकीकरण नै हुने हो,’ उनले भने ।
मंसिर ७ गते जनकपुरमा एउटा कार्यक्रम गरेर आफू औपचारिक रुपमा नेकपा एकीकृत समाजवादीमा प्रवेश गर्ने बताउँदै झाले आफूसँग अन्य नेता तथा कार्यकर्ता समेत प्रवेश गर्ने बताए । उनले भने, ‘मसँग सधैँ साथ रहनु हुने नेता तथा कार्यकर्ताहरु पनि सो पार्टीमा प्रवेश गर्नुहुन्छ ।’
माओवादी केन्द्रमा आफूलाई कुनै असन्तुष्टि नरहेको बताउँदै उनले सल्लाहमै यी सबै कार्य भइरहेको बताए । नेकपा एकीकृत समाजवादीमा आफू कुनै संगठनात्मक जिम्मेवारीमा रहेर काम गर्ने समेत उनले बताए ।
