केही दिन अघि नेकपा एमालेका नेता तथा भक्तपुर २ नम्बर क्षेत्रका संघीय सांसद महेश बस्नेतले नेपाली काँग्रेसका सभापति शेरबहादुर देउवालाई भक्तपुरको आफ्नो निर्वाचन क्षेत्रबाट आफूसंग आउंदो निर्वाचनमा लडेर हराउन चुनाौती दिएपछि आज काँग्रेस सभापति तथा प्रधानमन्त्री शेरबहादुर देउवाले आगामी चुनावमा काँग्रेसको उपस्थिति बलियो रहने बताएका छन् । भक्तपुरको सूर्यविनायक नगरपालिका वडा नम्बर ५ को वडा अधिवेशन उद्घाटन समारोहमा बोल्दै देउवाले भक्तपुरमा पार्टी बलियो अवस्थामा रहेको पनि बताए ।
देउवाले भक्तपुरका पार्टी सभापति दुर्लभ थापालाई हराएर देखाउन चुनौति दिए । भदौ पहिलो साता बस्नेतले भक्तपुरमा कांग्रेसका सभापति शेरबहादुर देउवालाई उठाए पनि आफुले सहजै रुपमा विजय हासिल गर्ने दावी गरेका थिए । बस्नेतले आगामी निर्वाचन पछि भक्तपुरमा कांग्रेसलाई सिला खोज्नुपर्ने अवस्था आउने चेतावनी समेत दिएका थिए । तर बस्नेतकै निर्वाचन क्षेत्रमा काँग्रेसको वडा अधिवेशन उद्घाटन समारोहमा देउवाले काँग्रेस सशक्त ढंगले अघि बढिसकेको बताए । उनले भने, ‘बस्नेतजीले मलाई होइन, भक्तपुरका पार्टी सभापति दुर्लभ थापालाई चुनाव हराएर देखाउनुस् ।
उनले पार्टीले महाधिवेशनको प्रक्रिया सुरुवात गरेको भन्दै लोकतान्त्रिक प्रक्रियाबाट नेतृत्व चयन गर्दै पार्टी थप सशक्त ढंगले अघि बढ्ने विश्वास गरे । उनले महाधिवेशन सफल बनाउन एकताबद्ध भएर लाग्न पनि नेता कार्यकर्तालाई आग्रह
गरे ।
