१४ भदौ, काठमाडौं । विवेकशील साझा पार्टीको झगडाले उग्र रुप लिएको छ । पार्टीभित्र देखिएको झगडाले छछल्किदै फुटको संघारमा समेत पुग्छकी भन्ने अनुमान लगाउन सकिने भएको छ । पार्टी अध्यक्ष रवीन्द्र मिश्रले आज एकाएक एकपक्षीय रुपमा केन्द्रीय कमिटी बैठक बोलाएका छन् ।
आज केन्द्रीय सदस्यहरुलाई ईमेल गरेर मिश्रले ‘पछिल्लो समय उत्पन्न परिस्थितिबारे छलफल गर्न भन्दै आउंदो बिहीबार केन्द्रीय कमिटी बैठक राखिएको जानकारी छ ।
तर अध्यक्ष मिश्रले पार्टी एकता गर्दा भएको सम्झौता विपरित एकपक्षीय रुपमा केन्द्रीय कमिटी बैठक बोलाएको भन्दै संयोजक पाण्डेले आपत्ति जनाएका छन् ।
पार्टी एकीकरणको सम्झौतामा अध्यक्ष र संयोजकको सहमतिमा बैठक बोलाउने भनिएको थियो । अध्यक्ष मिश्रले एकपक्षीय रुपमा बैठक बोलाउनु एकीकरणको सम्झौता विपरित भएको भन्दै पाण्डेले बैठक रोक्न माग गरेका छन् ।
अध्यक्ष मिश्रले संघीयता खारेजी र धर्मनिरपेक्षतामा जनमत संग्रह गर्नुपर्ने मागसहित राजनीतिक दस्तावेज सार्वजनिक गरेपछि विवेकशील साझामा वैचारिक मतभेद चर्किएको छ ।
मिश्रको दस्तावेज ‘उल्टो बाटो’ भएको भन्दै संयोजक पाण्डेसहित चार शीर्ष नेताले काउन्टर प्रतिवेदन सार्वजनिक गरेका थिए । त्यसयता पार्टीमा औपचारिक संवाद ठप्प थियो ।
