काठमाडौं । आज बसेको मन्त्रीपरिषद्को बैठकले बागमती प्रदेश प्रमुखमा यादवचन्द्र शर्मालाई सिफारिस गरेको छ । विहीबार सिंहदरबारमा बसेको मन्त्रिपरिषद बैठकले शर्मालाई प्रदेश प्रमुखमा नियुक्तिका लागि राष्ट्रपति विद्यादेवी भण्डारी समक्ष सिफारिस गरेको हो ।
प्रदेश प्रमुख विष्णुप्रसाद प्रसाईंलाई हटाएर शर्मालाई प्रदेश प्रमुख सिफारिस गरेको हो । मन्त्रीका अनुसार शर्मा नेकपा एमाले (समाजवादी) का अध्यक्ष माधव नेपालनिकट हुन्।
०६५ मा माधव नेपाल प्रधानमन्त्री हुँदा शर्मा स्वकीय सचिव बनेका थिए । काँग्रेस सभापति शेरबहादुर देउवा नेतृत्वको सरकारले पूर्ववत् सरकारले नियुक्त गरेका प्रदेश प्रमुख हटाउँदै नयाँ नियुक्त गरिरहेको छ ।
यसअघि लुम्बिनीमा अमिक शेरचन, गण्डकीमा पृथ्वीमान सिंह गुरुङ, प्रदेश २ मा हरिशंकर मिश्र नियुक्त भएका थिए । अब एमाले अध्यक्ष केपी शर्मा ओली नेतृत्वको सरकारले नियुक्त गरेका प्रदेश १ , सुदूरपश्चिम र कर्णाली प्रदेश प्रमुख मात्र हटाउन बाँकी छ ।
गण्डकी र प्रदेश २ मा काँग्रेस निकट गुरुङ र मिश्र प्रदेश प्रमुख बनेका छन् । यस्तै लुम्बिनीमा माओवादी निकट शेरेचन र बागमतीमा माधव नेपाल निकट शर्मा प्रदेश प्रमुख बनेका छन् । देउवाले नियुक्त गर्न बाँकी तीन जना प्रदेश प्रमुखमा माओवादी, एमाले समाजवादी र जसपाले एक एक प्रदेश प्रमुख पाउने सत्तारुढ गठबन्धनमा सहमति भएको छ ।
