संगीत कहिलेकाहीँ आवाज हुँदैन, स्मृति हुन्छ । र स्मृतिले जब लोकलय पाउँछ, त्यहीँबाट गीत जन्मिन्छ । गायक बेल बहादुर परियारको नयाँ दोहोरी सिर्जना ‘फूल खसिगो, माया बसिगो’ त्यस्तै स्मृतिको कथा हो, जसको म्युजिक भिडियो मंगलबार बर्दिबासमा सार्वजनिक गरियो ।
राष्ट्रिय लोक तथा दोहोरी गीत प्रतिष्ठान नेपाल, महोत्तरीको आयोजनामा गौतम होटलमा आयोजित विमोचन समारोह कुनै औपचारिक कार्यक्रमजस्तो मात्र देखिएन । जब मधेश प्रदेशकी पूर्व राज्य मन्त्री सारदा देवी थापा र बर्दिबास नगरपालिकाका मेयर प्रह्लाद कुमार क्षेत्रीले संयुक्त रूपमा भिडियो विमोचन गरे, त्यो क्षण लोकसंगीतप्रतिको सामूहिक सम्मानझैँ लाग्यो ।
गीतमा बेल बहादुर परियार र प्रतिमा अर्यालको स्वर छ । शब्द र सङ्गीत स्वयं परियारकै हुन् जहाँ सिर्जना कागजबाट होइन, अनुभवबाट निस्किएको अनुभूति हुन्छ । राजिव शाहको एरेञ्ज, मिक्स र मास्टरिङले गीतलाई समयअनुकूल बनाएको छ । भिडियोमा सन्जिब ठकुरी र सुजाता भट्टराईको अभिनयले प्रेम र विछोडको कथालाई मौन दृश्यभाषामा प्रस्तुत गरेको छ । निर्देशन मिलन श्रेष्ठ, कोरियोग्राफी राजाराम सिंखडा र छायाङ्कन सन्तोष तिमल्सिनाले गरेका छन् ।
कार्यक्रममा बोल्दै मेयर प्रह्लाद कुमार क्षेत्रीले स्थानीय सिर्जना स्थानीय मञ्चबाटै सार्वजनिक हुनु सांस्कृतिक आत्मविश्वासको संकेत भएको बताए । पूर्व राज्य मन्त्री सारदा देवी थापाले भने परियारको यात्रालाई निरन्तरताको पाठ भन्दै, प्रचारभन्दा पनि साधनाले कलाकार बनाउने धारणा राखिन् ।
राष्ट्रिय लोक तथा दोहोरी गीत प्रतिष्ठान नेपाल, महोत्तरीका अध्यक्षसमेत रहेका परियारले विमोचन समारोहमा धेरै बोलेनन् । तर उनले बोलेका शब्दभन्दा उनका गीतहरूले बढी कुरा गरे । उनले कलाकारले भोगिरहेको समय, संघर्ष र चुनौती स्मरण गर्दै दर्शक–श्रोताको माया नै सबैभन्दा ठूलो ऊर्जा भएको बताए ।
२०५१ सालमा रेडियो नेपालबाट ‘जाग नेपाली वीर नेपाली’ गाएर सुरु भएको परियारको यात्रा आजसम्म आइपुग्दा धेरै मोड पार गरिसकेको छ । सिन्धुलीका सुसेलीहरू, गरौं है रमाइलो, मिठो सम्झना, सुनको थैली चाँदीको झुम्कना हुँदै आएको यो यात्रा ‘फूल खसिगो, माया बसिगो’ मा आइपुग्दा अझ परिपक्व देखिन्छ ।
विमोचन कार्यक्रममा कलाकार, पत्रकार, समाजसेवी र संस्कृतिप्रेमीहरूको उल्लेख्य उपस्थिति थियो । कार्यक्रमको सञ्चालन बिनोद ढुङ्गेलले गरेका थिए ।
मिडिया पार्टनरका रूपमा ॐकार टेलिभिजनको लोकप्रिय कार्यक्रम ‘पञ्चामृत’ जोडिएको थियो । गीत गायकको आधिकारिक युट्युब च्यानल ‘बेल बहादुर परियार अफिसियल’ मार्फत सार्वजनिक गरिएको छ ।
लोकगीतले समयलाई समात्छ, मान्छेलाई सम्झाउँछ, अनि भविष्यतर्फ बग्छ ।
‘फूल खसिगो, माया बसिगो’ त्यही बगिरहने लोकयात्राको अर्को पाइलो हो ।
