७ असार, काठमाडौं । नेपाली क्रिकेट टोलीका अलराउण्डर दीपेन्द्रसिंह ऐरी नेपालका लागि सबैभन्दा धेरै टी-२०आई खेल खेल्ने खेलाडी बनेका छन् ।
शुक्रबार भएको स्कटल्याण्डसँगको खेल उनको ८२औं थियो जुन् नेपाली क्रिकेट खेलाडीका लागि सर्वाधिक हो । त्यस खेलअघि करण केसी र दीपेन्द्रसिंह ऐरी समान ८१ खेल खेलेका थिए ।
यद्यपी यो तथ्यांक परिवर्तन हुन पनि सक्नेछ । दीपेन्द्र चोटका कारण वा अन्य कारण टिममा नभएका बेला करण केसीले उनलाई उछिनेर सबैभन्दा धेरै टी-२०आई खेल्ने खेलाडी बन्न सक्छन् ।
उनको नाममा केही कीर्तिमान पनि बनेको छ । उनले कहिल्यै तोडिन नसक्ने ९ बलमा अर्धशतक बनाएका छन् जुन् बराबर मात्र हुन सक्छ । त्यस्तै टी-२०आईमा एकै ओभरको ६ बलमा ६ छक्का प्रहार गर्नै कमै खेलाडीको सूचीमा दीपेन्द्र पनि छन् ।
