काठमाडौं । सङ्घीय राजधानी काठमाडौंको तीनकुनेमा हिंसा मच्चाएर फरार भएका विवादित मेडिकल व्यवसायी दुर्गा प्रसाईँ कहाँ पुगे ? अहिले यो सर्वत्र चासोको विषय बनेको छ । र, प्रहरीको फन्दामा परिसकेका प्रसाईँ कसरी भाग्न सफल भए ? प्रश्न पेचिलो बनेको छ ।
व्यवस्था नै परिवर्तन गर्ने उद्घोषसहित सडकमा उत्रिएको राजावादीले गत शुक्रवार काठमाडौँको तीनकुनेमा शक्ति प्रदर्शन गर्यो । प्रदर्शन शान्तिपूर्ण गर्ने भनिएपनि त्यस्तो हुन सकेन । राजावादीहरूले तीनकुने–कोटेश्वर क्षेत्रमा ‘ताण्डवै’ देखाए ।
राजावादीको हिंसात्मक प्रदर्शनमा दुई जनाले ज्यानै गुमाउनु पर्यो भने एक सय जनाभन्दा बढी घाइते भए । स्थिति नियन्त्रणमा लिन प्रहरीले ५८ राउन्ड गोली चलाएको थियो भने ७४६ राउन्ड अश्रुग्यास प्रहार गरेको थियो । प्रहरी र आन्दोलनकारी गरी डेढ सयभन्दा बढी घाइते भए ।
हिंसात्मक समूहले तीनकुने, कोटेश्वर, बानेश्वर, बालकुमारी क्षेत्रका निजी भवन तथा सवारीसाधनमा तोडफोड तथा आगजनी मात्रै गरेनन्, भाटभटेनी सुपर स्टोरमा लुटपाट पनि गर्यो । स्थितिलाई नियन्त्रण लिन स्थानीय प्रशासनले निषेधाज्ञा नै लागू गर्नुपर्यो । सेना नै परिचालन गर्नुपर्यो ।
उक्त आन्दोलनका नाइके थिए– विवादित मेडिकल व्यवसायी दुर्गा प्रसाईँ । जो, नेकपा एमाले अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को राजनीति संरक्षणमा उदाएका पात्र हुन् । कांग्रेस पृष्ठभूमिका प्रसाईँ माओवादी, एमाले हुँदै अहिले खाँटी राजावादी बनेका छन् ।
उनी प्रसाईँको नेतृत्वमा भएको प्रदर्शनले उग्र रूप लिँदा हिंसात्मक बन्न पुग्यो । प्रदर्शनलाई हिंसात्मक बनाउन प्रसाईँ स्वयं तल्लीन थिए । प्रदर्शन सुरु भएको केहीबेरमा प्रसाईँले उत्तेजित हुँदै प्रहरी, सञ्चारकर्मी र आफ्नै समर्थकलाई समेत किचाउने हिसाबले गाडी हुइँक्याएर आए ।
प्रसाईँ उद्दण्डता मच्चाउँदै तीनकुने पुल कटेपछि उनलाई प्रहरीले नियन्त्रणमा लिइसकेको थियो । केही समर्थकहरू भएपनि प्रहरीले उनलाई घेरा हालिसकेको थियो । यद्यपि, जबरजस्ती नगर्नु भन्दै प्रतिवाद गर्ने कोसिस गरिरहे । तर, जब प्रसाईँलाई घेरेको भिडसँगै प्रहरी तीनकुनेतर्फ आए, त्यसपछि परिस्थिति बदलियो । उनी जति अगाडि बढे, त्यति नै समर्थकहरूले छोपिन थाले र पक्राउ पर्नेबाट जोगिए । प्रदर्शनले उग्र रूप लिँदै गर्दा प्रसाईँ भने सुराकी राखेर सटरभित्र लुके बसे । तर, प्रसाईँले त्यहाँ लामो समय बस्नु सुरक्षित ठानेनन् । त्यसपछि स्कर्पियो बोलाएर भागे ।
सोही राति मन्त्रिपरिषद्को आकस्मिक बैठक बस्यो । दुर्गा प्रसाईँलाई समात्न पनि त्यही बेला स्पष्ट आदेश प्राप्त भयो । त्यसपछि प्रसाईँलाई खोज्न प्रहरीका विभिन्न युनिटहरू परिचालित भए । केन्द्रको कडा निर्देशनपछि भारतसँग सीमा जोडिएका जिल्लाहरूले चेकजाँच बढाए । तर, अत्तोपत्तो लागेन । र, जहाँ बोलाए पनि आउँछु भनेका प्रसाईँ यतिन्जेल गायब छन् । उनको खोजीमा प्रहरीले सम्पूर्ण शक्ति लगाउनु परिरहेको छ ।
प्रहरीले खोजी गरिरहँदा प्रसाईँले भने सामाजिक सञ्जालमा भिडिओ सार्वजनिक गरेर चुनौती दिइरहेका छन् । तर प्रहरीले उनी कहाँ छन् भन्ने नै पत्ता लगाउन सकेको छैन । प्रसाईँले भने आफू नभागी आफ्नो ज्यान जोगाउन काठमाडौँकै कुनै एक मन्दिरमा सुरक्षित भएर बसेको भन्दै भिडियो सन्देश जारी गरेका छन् ।
तर, त्यस्ता मन्दिर नेपालमा कतै नभएको प्रहरीको निष्कर्ष छ । प्रहरी उच्च स्रोतको अनुसार प्रसाईँ अहिले भारत पुगिसकेका छन् । उनी कान्ति लोकपथ हुँदै चितवन पुगेर भारत छिरेको प्रहरी अधिकृतहरूको दाबी छ । शुक्रबार पक्राउबारे निर्णय गर्न ढिलाइ हुँदा प्रसाईँ भाग्न सफल भएको प्रहरीको दाबी छ ।
आन्दोलनका जनकमान्डर प्रसाईँ फरार हुँदा पूर्वराजा शाह भने फसादमा परेका छन् । राजावादी भीडले पत्रकारलाई नै जलाएर मारेपछि सामाजिक सञ्जालमा ‘ज्ञानेन्द्रलाई पक्राउ गर’ भन्ने माग व्यापक रूपमा उठ्न थालेको छ । पूर्वराजा शाहले मुलुकमा शान्ति सुरक्षा खलबल्याएको र हिंसात्मक आन्दोलन गराउन योजनाबद्ध भूमिका खेलेको भन्दै उनको गतिविधिमा सरकारले निगरानी पनि बढाएको छ ।
पूर्वराजा शाहलाई मुलुकबाहिर समेत जान नदिने नीतिले उनको राहदानी रद्द गर्ने प्रक्रिया पनि अघि बढाइएको छ । त्यस्तै सरकारले पूर्वराजा शाहको सुरक्षाका लागि खटिएका सुरक्षाकर्मी कटौती समेत गरेको छ । डिएसपी जगदीशचन्द्र हमाल नेतृत्वको २६ जनाको सुरक्षा टोलीलाई फिर्ता गरी त्यसमा १० जना कटौती गरेर डिएसपी प्रमोदप्रकाश पाठकको नेतृत्वमा १६ जनालाई मात्र त्यहाँ पठाइएको छ । त्यस्तै सरकारले राज्यविरुद्धको कसुरमा पूर्वराजा ज्ञानेन्द्रविरुद्ध अनुसन्धान गर्ने भएको छ ।
सरकारले संविधानको अधीनमा रही अनुसन्धान गर्न गृह मन्त्रालयलाई निर्देशनसमेत दिइसकेको छ । वर्तमान व्यवस्था पल्टाउने दाबीका साथ गठन गरिएको ‘राजसंस्था पुनर्स्थापनाका लागि संयुक्त जनआन्दोलन समिति’का संयोजक नवराज सुवेदी घरमै नजरबन्दमा छन् । प्रसाईँको कमाण्डिङमा शुक्रवार मच्चाइएको यो आतंकले राजावादीहरूको अभियानलाई नै पछाडि धकेलिदिएको छ ।
दृष्टिबाट
