काठमाडौं । सर्वोच्च अदालतले पशुपतिको जग्गामा बालुवाखानी सञ्चालन गर्न दिँदा भ्रष्टाचार गरेको आरोपमा एमाले नेता निर्मल कुइँकेललाई दोषी ठहर गरेको छ ।
बुधबार सर्वोच्च अदालतका न्यायाधीशद्वय कुमार रेग्मी र अब्दुल अजिज मुसलमानको इजलासले पशुपति क्षेत्र विकास कोषको जग्गा भाडामा दिँदा ४६ करोड रुपैयाँ भ्रष्टाचार भएको भन्दै परेको मुद्दामा एमाले नेता कुँकेलसहित ९ जनालाई दोषी ठहर गरेको हो ।
सर्वोच्च अदालतले कुइँकेलले ८३ लाख ४१ हजार रुपैयाँ भ्रष्टाचार गरेको ठहर गर्दै उनलाई ६ वर्ष कैद सजाय तोकेको छ । विशेष अदालतबाट पनि उनलाई त्यति नै जरिवाना सुनाइएको छ । उनले पशुपति क्षेत्र विकास कोषको सदस्य सचिव हुँदा बालुवाखानी सञ्चालनसम्बन्धी ठेक्काको फाइलमा निर्णय गरेका थिए ।
कुइँकेल तत्कालीन नेकपा एमाले काठमाडौं–४ का अध्यक्ष हुन् । त्यस्तै सर्वोच्चले पशुपति क्षेत्र विकास कोषका अर्का सदस्य सचिव सुशील नाहाटालाई पनि ९१ लाख ६३ हजार रुपैयाँ भ्रष्टाचार गरेको ठहर गरेको छ । उनलाई पनि सोही रकम बराबरको जरिवाना र ६ वर्ष कैद सजाय सुनाइएको छ ।
