११ भदौ, काठमाडौं । नेकपा एकीकृत समाजवादीको १०औं महाधिवेशन सकिएको करिब तीन महिना बितिसक्दा पनि पदाधिकारी र पोलिटब्युरो सदस्य चयनमा सहमति हुन नसक्दा आज निर्वाचन हुने भएको छ ।
पटकपटक सहमतिको प्रयासमा सहमति नभएपछि केन्द्रीय समिति बैठकले निर्वाचनको माध्यमबाट पदाधिकारी तथा पोलिटब्युरो सदस्य छनौट गर्ने निर्णय गरेको थियो । सोही निर्णयअनुसार पार्टीको निर्वाचन आयोगले निर्वाचन प्रक्रिया अघि बढाएको हो ।
आज बिहानदेखि उम्मेदवारी दर्ता, दाबी विरोध, उम्मेदवारी फिर्ता र अन्तिम नामावली प्रकाशन लगायत पक्रिया हुने छन् । त्यसपछि दिउँसो २ बजेदेखि मतदान सुरु हुने निर्वाचन तालिकामा उल्लेख छ ।
एकीकृत समाजवादीमा १८ सदस्यीय पदाधिकारीको व्यवस्था छ । तर, हाल अध्यक्ष, सम्मानित नेता र महासचिव गरी तीन पदाधिकारी मात्र छन् ।
आजको निर्वाचनबाट वरिष्ठ उपाध्यक्ष, उपाध्यक्ष, उपमहासचिव, सचिव र कोषाध्यक्ष पनि चयन हुनेछन् । यसैगरी ८४ सदस्यीय पोलिटब्युरो पनि निर्वाचनबाट चयन गरिने छ ।
एकीकृत समाजवादीमा ३४४ सदस्यीय केन्द्रीय कमिटीको व्यवस्था छ । केन्द्रीय कमिटी सदस्यहरुले पदाधिकारी र पोलिटब्युरो चयन गर्ने छन् ।
