जलजला, पर्बत ।बिगत केही महिनादेखि आकाशबाट पानी नपरेपछि पर्वतको जलजला गाउँपालिकाको बाँसखर्क, लेखफाँट ,सालिजा लगायत क्षेत्रमा किसानहरुमा निरासा छाएको बेला हिजो एकाएक पानी वर्षासँगै भारी असिना पानीले बालीनालीमा क्षती पुर्याएको छ ।
सोमबार साँझ परेको असिना पानीले जलजला-१ बाँसखर्कमा भर्खरै फुलेको सुन्तलाको फुल झारेर नष्ट पारेको छ । त्यसैगरी लेखफाट र सालिजामा हिउंदे आलु, जौ र पाक्न लागेको गहुँमा क्षती पुर्याएको छ। उता म्याग्दीको माथिल्लो भेगमा वर्षासँगै परेको असिनाले हिउँदेबाली नष्ट गरेको छ । म्याग्दीको रघुगंगा गाउँपालिकाको पाखापानी, पिप्ले, कुइनेमङ्गले, दग्नाम, झिँ, बेगखोलालगायत क्षेत्रमा असिना पानीले बाली नष्ट गरेको दग्नामका गुन पुनले बताउनुभयो । उहाँका अनुसार असिना पानीले मकै, आलु, जौ, गहुँ, उवा, साग लगायत हिउँदेबाली नष्ट गरेको छ ।
त्यसैगरी असिना पानीले केराखेतीमा पनि असर गरेको कृषकको भनाइ छ । मालिका , मंगला , बेनी नगरपालिका र धवलागिरी गाउँपालिकाका केही क्षेत्रमा पनि असिना पानी परिरहेको छ । खेतमा लगाएको बाली नष्ट भएपछि म्याग्दीका किसान चिन्तित छन् ।
