६ माघ, काठमाडौं । मधेश प्रदेशका कप्तान हरिशंकर शाह प्रधाानमन्त्री कप एकदिवसीय राष्ट्रिय प्रतियोगितामा कर्णाली प्रदेशविरुद्ध अर्धशतक प्रहार गरेको अर्को बलमा आउट भएका छन् । हरिले ६० बलमा यस प्रतियोगितामा आफ्नो पहिलो अर्धशतक प्रहार गरे ।
टियु क्रिकेट मैदानमा टस जितेर पहिला ब्याटिङ रोजेको मधेशले सुरुवाती २३.१ ओभरमा २ विकेट गुमाउँदै १ सय १८ रन बनाएको छ । हरि ६१ बलमा ६ चौकासहित ५० रनमा आउट भए । २४ औं ओभरको पहिलो बलमा हरि स्पिनर दीपेन्द्र रावतको बलमा युनिस सिंहबाट क्याच आउट भए । त्यसअघिको अन्तिम बलमा एक रन जोड्दै उनले अर्धशतक पूरा गरेका थिए । हरि यसअघि कोशीसँग २४, आर्मीसँग ४, वागमतीसँग १ र एपीएफसँग ८ रन बनाएका थिए ।
जारी प्रतियोगितामा कर्णाली ३ खेलमा २ मा जित र १ मा हारसहित छैटौं स्थानमा छ । मधेश ४ खेलमा समान २ मा जित र हारका साथ सातौं स्थानमा
छ । कर्णाली भैरहवामा तीन खेल खेलेर काठमाडौं आएको हो । पछिल्लो खेलमा मधेशले एपीएफलाई ५ विकेटले हराएको थियो । कर्णालीले पछिल्लो खेलमा लुम्बनी प्रदेशलाई ६० रनले हराएको थियो ।
