विराटनगर । झापाका मेडिकल व्यवसायी दुर्गा प्रसाईंले काठमाडौँमा व्यवस्थाविरोधी प्रदर्शन सुरु गरेको पर्सिपल्ट राप्रपाले पनि पूर्वराजा ज्ञानेन्द्र शाहसमेतको सहभागितामा झापामा अघोषित शक्ति प्रदर्शनको तयारी गरेको छ । झापाको विर्तामोडबाट झण्डै डेढ किलोमिटर पश्चिम रामचोकस्थित देवी पञ्चकन्या प्लटिङमा रहेको इकम कलेजले आयोजना गरेको पृथ्वीनारायण शाहको ५ फिट अग्लो सालिक अनावरण गर्ने कार्यक्रमका लागि पूर्वराजा शाह आजै झापा आउँदैछन् ।
त्यसअघि राप्रपाले नेपालको राष्ट्रिय झण्डा बोकेर पूर्वराजालाई उक्त होटलदेखि कलेज परिसरसम्म स्कर्टिङको तयारी गरेको छ । ‘हामी नागरिक समाजको हैसियतले राजाको भव्य स्वागतमा जान्छौँ । हामीले यति नै मानिस आउँछन् भन्ने आकलन गरेका छैनौँ । तर, उपस्थिति जतिसक्दो धेरै देखाउँ भन्नेमा छौँ । कार्यक्रमलाई इतिहासमा लेखाउने तयारी गरेका छौँ,’ राप्रपाका कोशी प्रदेश अध्यक्ष राम थापाले भने, ‘हामी नागरिक भएर राष्ट्रिय झण्डा बोकेर बाटोमा स्वागत गर्छौं, पुष्प गुच्छा दिन्छौँ ।’
धुलाबारीमा रहेको होटल मेची क्राउनबाट पूर्वराजा सर्वसाधारणलाई भेट्दै कलेजसम्म पुग्ने उनले बताए । पूर्वराजाको स्कर्टिङमा ८ हजारभन्दा बढी मोटरसाइकल हुने राप्रपाका नेताहरुले बताएका छन् ।
कोशी प्रदेश प्रहरी कार्यालय विराटनगरका प्रमुख डीआइजी राजेशनाथ बाँस्तोलाका अनुसार पूर्वराजाले कलेजको प्राङ्गणमा रहेको पृथ्वीनारायण शाहको सालिक अनावरण गरेर भोलि नै फर्किने कार्यक्रम तय गरेका छन् । ‘मानिसहरु जति भिडभाड भए पनि हामी सुरक्षा दिन्छौँ । अहिलेसम्म सुरक्षामा आँच आउने खालको कुनै गतिविधि हुँदैन भन्ने लागेको छ,’ उनले भने ।
इकम कलेजका प्रमुख आलोक कार्कीले झापा जिल्लाका सबै नागरिक समाज तथा राजनीतिक पार्टीलाई कार्यक्रममा निमन्त्रणा गरेको जानकारी दिए । कार्यक्रमलाई कुनै पनि राजनीतिक पार्टीसँग जोडेर नहेर्न उनले आग्रह गरे । ‘हामीले मूर्ति स्थापना गर्ने कुरा चल्दा के राख्ने या नराख्ने भनेर विभिन्न चरणमा छलफल गर्दा हाम्रो राष्ट्रलाई एकीककरण गर्नुहुने राष्ट्रिय विभूति पृथ्वीनारायण शाहको सालिक बनाउने निर्णय गरिएको हो,’ उनले भने ।
विद्यार्थीहरुलाई इतिहासको सम्झना दिलाउनका लागि सालिक बनाउन लागिएको उनले बताए । क्याम्पसमा पूर्वराजाले २० मिनेट समय दिने उनले उल्लेख गरे । आफूहरुले आयोजना गरेको कार्यक्रमको अवसर पारेर राप्रपाले मौका छोपेको हुनसक्ने उनले बताए ।
‘राप्रपाले क्याम्पसको कार्यक्रमको अवसरमा मौका छोपेको हुनसक्छ । त्यसलाई हामीले रोक्न सक्दैनौँ । ५–६ सय विद्यार्थी र उनीहरुका आफन्तहरु आउन सक्छन् । त्यसो हुँदा केही मान्छे आउन सक्छन्,’ उनले भने ।
रातोपाटीबाट
