बेइजिङ । चिनियाँ राष्ट्रपति सी जिनपिङले विश्वमा शान्ति, स्थायित्व र विकासको महत्त्वपूर्ण जिम्मेवारी चीन र अमेरिकाको साझा भएको बताएका छन् । सिनो–अमेरिकन एभिएनस हेरिटेज फाउन्डेसनका जेफरी ग्रिनी र फ्लाइङ टाइगर्सका ह्यारी मोयर र मेल म्याकलेनको पत्रको जवाफ दिँदै राष्ट्रपति सीले सो कुरा बताएका हुन् ।
इतिहासलाई सम्झँदै राष्ट्रपति सीले चीन र अमेरिकाका नागरिक सँगै मिलेर जापानी फासिजमविरुद्ध लडेको र कठिन समयबाट गुज्रिँदै राम्रो मित्रता कायम गरेको जिकिर गरे । भविष्यबारे चर्चा गर्दै राष्ट्रपति सीले दुई महान् शक्ति राष्ट्रहरूले आपसी सम्मान, शान्तिपूर्ण अस्तित्व र दुवै पक्षको जीत हुने सहकार्यलाई हासिल गर्नुपर्नेमा जोड दिए ।
चीन र अमेरिकाको सम्बन्धको आशा र आधार जनतामा निहित भएको र भविष्यको दुई पक्षीय सम्बन्ध युवामा आधारित हुने पनि बताए ।–सीजीटीएन
