आगामी वैशाख १० गते हुने उपनिर्वाचनमा तनहुँ–१ बाट उम्मेदवार बनेका राष्ट्रिय स्वतन्त्र पार्टीका उम्मेदवार स्वर्णिम वाग्ले यतिबेला घरदैलोमा व्यस्त छन् । विगतमा नेपाली कांग्रेसबाट राजनीति गरेका उनी अहिले कांग्रेसको पकेट क्षेत्रका रूपमा रहेको तनहुँमा कांग्रेसविरुद्ध धावा बोलिरहेका छन् ।
नेपाली कांग्रेसको प्रमुख तारो बनेका वाग्ले पूर्वपार्टीको भोट काट्ने अभियानमा छन् यता कांग्रेस भने उनलाई आफ्नो प्रतिस्पर्धी नै स्वीर्कान तयार छैन ।
एकदम उत्साहका साथ घरदैलो चलिरहेको छ । तपाईंले देखिरहनुभएको छ । जनतामा छुट्टै चमक उत्साह देखिन्छ । यसअघि मलाई प्रत्यक्ष नचिने पनि सामाजिक सञ्जाल र सूचना प्रविधिको पहुँचले नाम सुन्नुभएको रहेछ । म अपरिचित पात्र रहेनछु भन्ने महसुस भयो । एक पटक घरमा आइदिओस् भनेर उहाँहरूले चाहना देखेपछि कार्यक्रममा हिँडिरहेको छु । उम्मेदवारको अनुहार हेर्न पाऊँ भन्ने आकाङ्क्षा रहेछ । लोकतन्त्रको त्यो सुन्दर पक्ष पनि हो ।
सकेसम्म, भ्याएसम्म म मेरा हरेक मतदाताहरूलाई भेटेर दुई हात जोडेर भोट माग्ने प्रयासमा छु । त्यसैको क्रममा आज हामी व्यास नगरपालिकाका विभिन्न वडाहरूमा घरदैलोमा व्यस्त छु ।
जनताको अपेक्षा के के रहेछन् ?
स्थानीय अपेक्षाहरू र गर्नुपर्ने धेरै छन् । स्थानीय बाटा, खानेपानी, अव्यवस्थित बसोबासका समस्याहरू धेरै छन् । अर्को सबैभन्दा ठूलो समस्य त यहाँबाट रोजगारीका लागि विदेशिनुपर्ने बाध्यता हो । केही पनि नभएको भन्ने पनि छैन । यसका गुणस्तरको पाटाहरू छन् । त्यस विषयमा आस्वस्त पार्दै आएको छु । उहाँहरूलाई मैले भन्दै आएको छु, म निर्वाचित भएर गएपछि एउटा संसद्ले के के गर्न सक्छ, त्यो गर्छु ।
देश नै गलत दिशातिर गइरहेको छ । यसलाई सही दिशातिर ल्याउनुप¥यो । युवालाई विदेश जानबाट रोक्नुपर्छ । धेरैका छोराछोरी विदेशी हुनुहुन्छ । यसरी देश विकास सम्भव छैन । उहाँहरूले विदेशबाट अहिले फोन गरेर परिवारसँग घण्टी चिह्नमा भोट हाल्नु भन्नुभएको छ । मैले व्यापक सुनिरहेको छु । यहाँको निर्वाचन तनहुँमा मात्र नभएर, समग्र देश र अन्तर्राष्ट्रिय क्षेत्रमा प्रचार छ । जुन सुखद कुरा पनि हो ।
तपाईंसँगको प्रतिस्पर्धामा बलिया उम्मेदवारहरू छन् । प्रतिस्पर्धीहरूलाई कसरी हेर्नुभएको छ ?
मेरा प्रतिस्पर्धी साथीहरूका बारेमा केही टीकाटिप्पणी गर्न चाहन्नँ । म स्वस्थ र मित्रवत् प्रतिस्पर्धा गर्न चाहन्छु । अन्य साथीहरूका बारेमा केही भन्न चाहन्नँ ।
कांग्रेसका उम्मेदवार गोविन्द भट्टराईलाई जिताउन कमान्ड गरिरहेका कांग्रेस नेता शङ्कर भण्डारीले त तपाईंहरूलाई त बर्खामा आएको भेलको संज्ञा दिनुभएको छ । के भन्नुहुन्छ ?
उहाँले जे गर्न खोज्नुभएको छ, त्यो पूरा होस् । मेरो शुभकामना छ ।
तपाईंले अघि जनताको समस्या खानेपानी, सडक, बिजुली रहेको भन्नुभयो तर यी कुराको व्यवस्था गर्ने काम सङ्घीय सांसदको क्षेत्राअधिकारभन्दा बाहिरको कुरा हो । यी काम पूरा गर्छु भन्नुभएको छ तर कसरी मिलाउनुहुन्छ ?
यहाँ स्रोतहरू नै पुग्दैन । हुन त बजेट पनि आउँछ । वडा स्तरमा एक करोडसम्म बजेट हुन्छ । त्यो आकाङ्क्षा पूरा नहुने भएकाले स्थानीय जनप्रतिनिधिसँग मिलेर कहाँबाट बजेट जुटाउन मिल्छ, हामी इमानदार प्रायस गर्छौैं ।
अहिले तपाईंको पार्टीका एक सांसदले पैसा मागेको अडिओ भाइरल छ । यसले तपाईंको भोटमा असर गर्छ भन्ने चर्चा सुनिन्छ । सुशासनको कुरा गर्ने तपाईंको दलमा सुरुमै भ्रष्टचारको कुरा सुनियो नि ?
एउटा नयाँ पार्टीमा थरिथरिका मान्छे आउँछन् । अब पार्टीले के गर्छ, त्यो ध्यान दिनुस् । ७०/७२ घण्टाभित्र यसको यथार्थ पत्ता लगाएर कारबाही गर्ने कुरा हाम्रो सभापतिले भनिसक्नुभएको छ । अब त्यो हेर्नुस् । अरू पार्टीका पनि अडिओ काण्डहरू हामीले सुनेका हौँ । ती व्यक्ति चुनाव जितेर आएको हामीले देखेका छौँ । उहाँहरू महत्त्वपूर्ण ओहोदामा बस्नुभएको छ । हाम्रो पार्टीका सांसदले गल्ती गर्नुभएको रहेछ भने साँच्चिकै कारबाही हुन्छ । केही समय पर्खर्नुस् ।
अनलाइनखबरबाट
