२६ चैत, काठमाडौं । राष्ट्रिय स्वतन्त्र पार्टी (रास्वपा) का सांसद ढाकाकुमार श्रेष्ठले मेडिकल व्यवसायी दुर्गा प्रसाईंसँग २ करोड रुपैयाँ मागेको अडियो सार्वजनिक भएको छ ।
आफू स्वास्थ्यमन्त्री बन्न लागेको र त्यसका लागि पार्टीलाई साढे २ करोड रुपैयाँ बुझाउनुपर्ने भन्दै सांसद श्रेष्ठले बी एण्ड सी मेडिकल कलेजका सञ्चालक प्रसाईंसँग रकम मागेका हुन् । कपुरबोट डटकमले सार्वजनिक गरेको अडियोमा सांसद श्रेष्ठले आफ्नो दलले स्वास्थ्य मन्त्रालय पाउने भएको र मन्त्री बन्नका लागि नेताहरुले आफूसँग साढे २ करोड मागेको बताएका छन् ।
३ माघमा मन्त्रिपरिषद् विस्तार हुनुअघि भएको यो संवादमा सांसद ढाकाकुमार श्रेष्ठले भनेका छन्, ‘स्वास्थ्य हामीले पाउने भयो, पार्टीलाई सहयोग गर, साढे २ जति चाहियो भन्दै थिए । मेरो पक्का भयो, मैले आज फिक्स गर्नु छ क्या सर !’
सुरुदेखि नै रविलाई सहयोग गर्दै आएको कोर टिमले रकम मागेको सांसद ढाकाकुमारले बताएका छन् । उनले भनेका छन्, ‘रवि सर देखा पर्नुभएको छैन, बाहिरका २/३ जना साथी हुनुहुन्छ । उहाँहरुलाई दिने हो, पार्टीलाई जान्छ भनेका
छन् ।’
उनले मेडिकल व्यवसायी प्रसाईंलाई रकम दिए आफूले मिलेर काम गर्ने समेत बताएका थिए ।
ह्वाट्सएपमा भएको भनिएको संवादमा व्यवसायी प्रसाईंले पनि २ करोड सहयोग गर्ने, तर त्यसका लागि केही समय लाग्ने बताएका छन् । ‘तपाईंलाई मैले २ करोड रुपैयाँ दिने ग्यारेन्टी गरें’ प्रसाईंले भनेका छन्, ‘उनीहरुसँग टाइम माग्नुस्, म दिन्छु भन्नुस् ।’
संवादका क्रममा प्रसाईंले तोसिमा कार्कीले लडाईं गर्दिनन् नि भन्ने प्रश्न गरेका छन्, जसमा रास्वपा सांसद ढाकाकुमारले मन्त्री छान्ने जिम्मा रवि लामिछानेलाई दिइसकेका कारण कुनै समस्या नहुने बताएका थिए ।
त्यो बेलामा स्वास्थ्यमन्त्रीका लागि रास्वपामा ढाकाकुमारसँगै डा. चन्दा कार्की र डा. तोसिमा कार्की आकांक्षी थिए । ३ माघमा भएको मन्त्रिपरिषद विस्तारका क्रममा स्वास्थ्य मन्त्रालय एमालेले पायो । स्वास्थ्य राज्यमन्त्री भने रास्वपाकी तोसिमा भइन् ।
यद्यपि २२ माघमै रास्वपाले सरकार छाड्यो । तर त्यसको दुई महिनापछि अडियो सार्वजनिक भएको छ ।
निलम्बन गरेर छानबिन गर्छौं
आफ्नो सांसदले मन्त्री बन्नका लागि पार्टीमा बुझाउनुपर्यो भन्दै मेडिकल व्यवसायी प्रसाईंसँग रकम मागेको अडियो सार्वजनिक भएपछि रास्वपाले छानबिन गर्ने बताएको छ ।
सांसद श्रेष्ठलाई निलम्बन गरेर छानबिन लागि समिति बनाउन लागिएको रास्वपा सहमहामन्त्री कविन्द्र बुर्लाकोटीले
बताए ।
पढ्नुहोस् अडियोको लिखित रुप
दुर्गा प्रसाईं : नमस्ते के छ नि हालखबर ?
ढाकाकुमार श्रेष्ठ : ठीक छ सर, म पनि भर्खर भर्खर उठेको ।
दुर्गा प्रसाईं : त्यही त राति अनि मैले पनि फोन अफ गरें । सुत्ने बेला भएर चार्जमा राखेर सुतें । अनि नि, खास चाहिँ कुरा के मलाई अलिकति भन्नु त डाक्टर साब ।
ढाकाकुमार श्रेष्ठ : स्वास्थ्य हामीले पाउने भयौं । पार्टीलाई अलि अलि सहयोग गर भनिएको छ । आन्तरिक कोर टिम २/३ जनाको । साढे २ जति चाहियो भन्दै थिए मलाई हिजो । मेरो पक्का चाहिँ पक्का भयो । आज त्यो मैले फिक्स गर्नुछ के दाइ, सर । म फेरि आर्थिकमा त्यस्तो उ छैन । मन्त्री पनि बन्न पर्यो । धोइपखाली गरेर यो स्वास्थ्य क्षेत्र सुधार्न छ ।
ढाकाकुमार श्रेष्ठ : केही गर्छु भनेर मैले सोच गरेको छु । त्यसमा हजुरहरुको सहयोग सपोर्ट चाहियो ।
दुर्गा प्रसाईं : अच्छा, मैले तपाईसँग एउटा कुरा बुझ्न खोजेको । राष्ट्रिय स्वतन्त्र पार्टीमा डाक्टर भनेको मैले त डाक्टर तोसिमा कार्की मात्रै छिन् भनेर बुझेको थिएँ ।
ढाकाकुमार श्रेष्ठ : होइन नि हामी तीन जना छौं ।
दुर्गा प्रसाईं : को को ?
ढाकाकुमार श्रेष्ठ : म भएँ, तोसिमा कार्की र चन्दा कार्की ।
दुर्गा प्रसाईं : ए साच्ची चन्दा कार्की म्याम पनि हुनुहुन्छ नि है ?
ढाकाकुमार श्रेष्ठ : चन्दालाई हजुरले चिन्नुहुन्छ होला ।
दुर्गा प्रसाईं : डाक्टर साबको घर चाहिँ कहाँ हो डाक्टर साब ?
ढाकाकुमार श्रेष्ठ : मेरो पोखरा हो सर ।
दुर्गा प्रसाईं : ए, अनि एमबीबीएस कहाँ गरेको ?
ढाकाकुमार श्रेष्ठ : मैले चाइनाबाट हो सर ।
दुर्गा प्रसाईं : ए । अनि एमडी ?
ढाकाकुमार श्रेष्ठ : एमडी अहिले मैले गरेको छैन । एमबीबीएस मात्रै हो ।
दुर्गा प्रसाईं : एमएस चाहिँ ?
ढाकाकुुमार श्रेष्ठ : पछि यता अर्कै तिर…। पढ्ने भन्दा भन्दै पोलिटिक्स तिर आएँ म ।
दुर्गा प्रसाईं : अब हेर्नुस है । स्वास्थ्यमा धेरै ठूलो समस्या छ । हैन डाक्टर साब ? देशमा भएका सबै नर्सिङ कलेज बन्द गराए । आज नर्स पढ्न पाउँदैनन् । दुबईका डान्सबारमा हाम्रै चेलीबेटीले डान्स गरेका छन् । त्यसो गर्न भन्दा नर्स पठाऔं । हो कि होइन ?
ढाकाकुमार श्रेष्ठ : हो नि त । हो नि त ।
दुर्गा प्रसाईं : मैले त डाक्टर उत्पादन गरौं । सयवटा मेडिकल कलेज खोलौं भनेको हुँ । हो कि होइन भन्नु त ? इण्डियाबाट विद्यार्थी ल्याऔं । हस्पिटल फ्री गरौं । कति राम्रो कुरा गरेको मैले ?
ढाकाकुमार श्रेष्ठ : हो नि ।
दुर्गा प्रसाईं : डाक्टर साबको नाम ढकबहादुर कि के हो ?
ढाकाकुमार श्रेष्ठ : ढाकाकुमार श्रेष्ठ
दुर्गा प्रसाईं : ए, ढाकाकुमार श्रेष्ठ । अच्छा मैले त्यो कुरो बुझें । सल्लाह गरेर अघि बढौंला । तपाईसँग मैले एउटा कुरा भन्न खोजेको, अहिले हामी त ह्वाट्स एपमा छौं । मतलब भएन । मुकुलहरुले त स्वास्थ्य र शिक्षा नलिने भन्थे त ?
ढाकाकुमार श्रेष्ठ : स्वास्थ्य, शिक्षा नलिने…। मुकुलजीलाई यो कुरा त्यति थाहा छैन सर । आन्तरिक कुरा हो । मुकुल जी पनि त्यो कोर टिममा हुनुहुन्न के । बाहिर बाहिर महामन्त्री नै हो । हजुरलाई पार्टीको कुरा गर्दा त्यहाँ २/३ जना छुट्टै हुनुहुन्छ रविसरलाई धेरै सहयोग गर्ने । सुरुवाती क्षणदेखि नै धेरै सहयोग गर्ने । त्यो टिमबाट मलाई कुरा आएको हो । आज मैले पैसा पेश गर्नुपर्दछ । उधारो हुन्न भन्छन् फेरि ।
दुर्गा प्रसाईं : क्यास पैसा । अढाई करोडको कुरा आयो ? दुई करोड ?
ढाकाकुमार श्रेष्ठ : दुई साढे दुई करोड भनेका छन् । अहिले मैले एक दिएँ भने पनि मान्छन् होला । पछिको चेक दिए पनि मान्छन् के २/३ दिनको ।
दुर्गा प्रसाईं : आज बन्द छ नि त । सुन्नुस् है कुरा । बैंकबाट ९ लाख ९९ हजार भन्दा बढीको चेक साटिँदैन । सुन्नुस् क्लियर कुरा । एउटा टाइम राखेर गर्ने हो भने मैले दिन्छु, म सहयोग गर्छु तपाईंले भनिहाल्नुभयो । भोलि मेरो पनि काम गर्नुपर्छ तपाईंले?
ढाकाकुमार श्रेष्ठ : होइन, होइन त्यो त म गर्छु । मलाई त यो गोविन्द केसी देखेर दिक्क लाग्छ । कहिले मर्छ जस्तो लाग्छ । पुरै एमबीबीएस पढ्न नपाएको पनि तिनले गर्दा हो ।
दुर्गा प्रसाईं : मैले मेरी छोरीलाई एमडी पढ्न जापान पठाउन पर्यो । टोकियो युनिभर्सिटीमा ३ करोड तिरेर । मेरो आफ्नोमा पढाउन पाइनँ ।
ढाकाकुमार श्रेष्ठ : त्यही त । यो सबै बेथिति छ ।
दुर्गा प्रसाईं : मेरो त हेर्नुस् न । म त कति मरेको छु । मेरो मेडिकल कलेज हेर्नुस् त । सबै भौतिक पूर्वाधार पुगेको र काठमाडौं उपत्यका बाहिरको । मेची अञ्चलमा ३२ लाख पपुलेसन छ । म त डुबेको छु कि छैन ? म त मर्न मात्रै बाँकी छ ।
ढाकाकुमार श्रेष्ठ : त्यही त । यस्तो कुरा हटाउनुपर्छ सर । यो पनि समस्या समाधान गर्नुपर्दछ ।
दुर्गा प्रसाईं : शिक्षा चाहिं कसले लिने भएछ भाइ, हँ डा साब?
ढाकाकुमार श्रेष्ठ : शिक्षा हामीलाई परेन जस्तो छ सर ।
दुर्गा प्रसाईं : ए, शिक्षा हजुरबुवा (केपी शर्मा ओली) ले राखे होलान् ।
ढाकाकुमार श्रेष्ठ : अँ सायद राख्नुभयो होला ।
दुर्गा प्रसाईं : किनभने यसपालि मेरो कलेजलाई पनि एफिलिएसन दिनुपर्ने छ के हजुरबुवाले ? सबै कुरा सकिएको छ
कि । काठमाडौं युनिभर्सिटीले एफिलिएसन दिएको छ । सिट मात्रै टुंगिएको छैन । त्यो (श्रीकृष्ण) गिरी त नारायणकाजीको मान्छे हो नि त । त्यहाँबाट पैसा उठाएर लगेर नारायणकाजीलाई बुझाउने मान्छे हो के त्यो ।
ढाकाकुमार श्रेष्ठ : ए हजुर हजुर ।
दुर्गा प्रसाईं : यसो गर्नुस् न त ।
ढाकाकुमार श्रेष्ठ : हजुर निश्चिन्त हुनुस् । अब काम तपाईं म मिलेर गर्ने हो ।
दुर्गा प्रसाईं : एकछिन एकछिन । भोलि केपी ओली झापा आउँदै हुनुहुन्छ । भोलि दुई गते । आज त छुट्टी भइगयो । म भोलि बेलुका हजुरबुबासँगै म काठमाडौं आउँछु । तपाई र म भेटौला । तपाईंको यो उस्को ग्यारेन्टी गर्नुस् । तपाईलाई गर्ने सहयोग म गर्छु । तपाईंले भन्नुभयो नि, जुन दुई । म आएर गरौला । तर अलिकति टाइम लाग्छ है । पैसा मिलाएर निकाल्नुपर्छ । त्यत्तिकै निस्किँदैन हचुवामा । अहिले त बैंकले जम्मै सिस्टम खोज्छ । त्यति सजिलो हुँदैन । भ्वाक भ्वाक बाकसमा पैसा लिएर त गाह्रो छ ।
ढाकाकुमार श्रेष्ठ : अँ ।
दुर्गा प्रसाईं : कुरो बुझ्नु भयो के ? त्यो त कसैले पनि दिन सक्दैन, आजको आजै पैसा । नेपालमा कसैले सक्दैन ।
ढाकाकुमार श्रेष्ठ : त्यही त ।
दुर्गा प्रसाईं : अनि फेरि हिजो ।
ढाकाकुमार श्रेष्ठ : समस्या छ त ।
दुर्गा प्रसाईं : हिजो पुस मसान्त । हिजो बैंकको ब्याज बुझाइयो ।
ढाकाकुमार श्रेष्ठ : अँ । हजुरलाई नि साह्रै गाह्रो छ होला है बिचरा ।
दुर्गा प्रसाईं : गाह्रो छ नि । म त हिजो पुस मसान्तमा ब्याज बुझाएँ । मेरो उ स्वास्थ्य बीमाको पैसा १४, १४–१५ करोड पैसा अझै दिएको छैन स्वास्थ्य बीमाले अढाई वर्षदेखि ।
ढाकाकुमार श्रेष्ठ : अँ । बीमा पनि अहिले नेपालमा १२ अर्बको चैं लगानी हुने रहेछ नेपालमा ।
दुर्गा प्रसाईं : हो त नि ।
ढाकाकुमार श्रेष्ठ : बीमा पनि सप्बैतिर लागू गर्नु पर्ने छ ।
दुर्गा प्रसाईं : हैन त्यो त । बीमा कसरी लागु गर्ने म तपाईँलाई भन्दिन्छु । अब तपाईंले के कुरा ग्यारेन्टी गर्नु भने दुई करोड पैसा मैंले दिने भएँ तपाईँलाई हैन ।
ढाकाकुमार श्रेष्ठ : हजुर ।
दुर्गा प्रसाईं : यो पैसा पनि त तपाईंले उही रविलाई त बुझाउनु पर्ला नि हैन भोलिपर्सि ?
ढाकाकुमार श्रेष्ठ : अँ । मैले रवि सरलाई भन्दा पनि रवि सर देखा पर्नुभएको छैन । बाहिरको २ जना ३ जना साथीहरु हुनुहुन्छ ।
दुर्गा प्रसाईं : अँ ।
ढाकाकुमार श्रेष्ठ : उहाँहरुलाई दिने हो । अब पार्टीलाई जान्छ भनेका छन् क्यारे ।
दुर्गा प्रसाईं : अँ । अब यी सबै कमाउने त हुन् नि भाइ । अब के भन्नु ?
ढाकाकुमार श्रेष्ठ : अँ, अब कसरी गर्छन् थाहा छैन । पार्टीमा जान्छ कि जान्न त्यो पनि मलाई थाहा छैन । मैले सोधेकै छैन क्या । पार्टी कमजोर छ । अहिले स्रोत यति छ साह्रै गाह्रो छ भन्या छन् ।
दुर्गा प्रसाईं : ए ।
दुर्गा प्रसाईं : ल सर ठीकै छ । म भोलि बेलुका नभए पर्सि आउँछु अनि दाजु भाइ भेटौंला नि त । तपाईँले उ ग्यारेन्टी गर्नुस म दिन्छु । तर मलाई अलिकति टाइम चाहियो भन्नुस् ।
ढाकाकुमार श्रेष्ठ : अँ ।
दुर्गा प्रसाईं : है ।
ढाकाकुमार श्रेष्ठ : अँ । हुन्छ सर । म त्यो कुरा गर्छु ।
दुर्गा प्रसाईं : ल ल ल ल ।
ढाकाकुमार श्रेष्ठ : हजुर भोलि आउनुहुन्छ ? बेलुका ?
दुर्गा प्रसाईं : अँ म भोलि बेलुका । यहाँ हजुरबुबा आउने भएर बस्नुपर्यो कि । अनि म भोलि आउँछु ।
दुर्गा प्रसाईं : है । है है डाक्टर साब ।
ढाकाकुमार श्रेष्ठ : हस हस हस सर ।
दुर्गा प्रसाईं : हस हस हस ।
ढाकाकुमार श्रेष्ठ : हस हस हस । तपाईँ र म चाहिँ सबै सल्लाहले । के के गर्नुपर्छ ? सल्लाहले अघि बढौंला ।
दुर्गा प्रसाईं : तपाईंलाई मैले । तपाईँलाई मैले एउटा के कुरा ग्यारेन्टी गरेँ भने २ करोड रुपैयाँ दिने ग्यारेन्टी गरेँ । तपाईंलाई म सजिलो बाटो देखाइदिन्छु । त्यो आएर म आएर मिलाउँछु । त्यसमा पीर नगर्नुस् । उनीहरुसँग टाइम माग्नुस् । ल म दिन्छु भनेर भन्नुहोस् । सक्कियो कुरा ।
तपाईं र म एक ठाउँमा भेट्नुपर्छ । भेटिराख्नु पनि पर्दैन । फोन पनि गर्नु पर्दैन । तपाईँलाई । म जति भिडेको छु नि यो स्वास्थ्य क्षेत्रमा । गोविन्द केसी के भिडेको छ ? कुरो बुझ्नुभएन ?
ढाकाकुमार श्रेष्ठ : त्यै त ।
दुर्गा प्रसाईं : तपाईंलाई म आइडिया दिन्छु । यो दुई करोड तपाईंको ग्यारेन्टी भयो म दिन्छु । तपाईं पीर नगर्नुस् । तपाईं अघि बढ्नुस् ।
दुर्गा प्रसाईं : है । अब तोसिमाले लडाईँ त गर्दिनन् नि ? तोसिमा कार्कीले तपाईँसँग ?
ढाकाकुमार श्रेष्ठ : हैन । गर्दिनन् गर्दिनन् । केही समस्या छैन । त्यो त्यो टिमले गरेपछि सक्कियो । हामीले त सब्बै रवि सरलाई म्यान्डेड दिएका छौं ।
दुर्गा प्रसाईं : अँ ।
ढाकाकुमार श्रेष्ठ : उहाँले जस्लाई राख्नुभयो । राख्नुभयो त्यो ।
दुर्गा प्रसाईं : ए । ल । अब फेरि यस्तो भयो नि त । तोसिमाले पैसा निकाल्न पनि सक्दिनन् । तोसिमाले पैसाको कुरा गर्न सक्दिन । किन भन्नु न ? गोविन्द केसीको मान्छे भन्या छ के उसले । कहिँ कुरै गर्न मिल्दैन ।
दुर्गा प्रसाईं : उसँग डराउँछन् ।
ढाकाकुमार श्रेष्ठ : तिनी मन्त्री भइन् भने काम पनि छैन ।
दुर्गा प्रसाईं : काम छैन ।
दुर्गा प्रसाईं : हस् हस भाइ । हस हस डाक्टर साब ।
दुर्गा प्रसाईं : हस हस ल ल ।
ढाकाकुमार श्रेष्ठ : हस् हस नमस्कार ।
