१७ फागुन, काठमाडौं । युक्रेनले रुसको राजधानी मस्को नजिक ड्रोनमार्फत् आक्रमणको प्रयास गरेको रुसी अधिकारीहरुले दाबी गरेका छन् ।
राजधानी मस्को नजिकको एक गाउँमा एउटा ड्रोन सोमबार मध्यरात दुर्घटनाग्रस्त अवस्थामा फेला परेको थियो । त्यो ड्रोन युक्रेनमा बनेको पाइएको छ । तर त्यसबाट कुनै क्षति भने भएको छैन । रुसले यो घटनालाई युक्रेनले गरेको आक्रमणको असफल प्रयास भनेर टिप्पणी गरेको छ ।
उनले भने, ‘युक्रेनले सोमबार मध्यरातिदेखि मंगलबार बिहानसम्म ड्रोन प्रहार गरिरह्यो र त्यसलाई असफल बनाउन रुस डटिरह्यो । त्यसबेला एउटा ड्रोन दुर्घटना भएको थियो ।’
मस्कोका गभर्नर बोरोब्योबले मानव बस्तीहरु सुरक्षित रहेको भन्दै घटनाको विस्तृत अनुसन्धान भइरहेको जानकारी दिए । ड्रोन खसेको गुबास्तोब गाउँमा सहायताकर्मी र बम प्रतिरोधी टोली पठाइएको छ ।
रुसको वस्ती नजिक खसेका ड्रोन भनेर सामाजिक सन्जालमा फोटोहरु सार्वजनिकसमेत भएका छन् । त्यसको आधिकारिक रुपमा पुष्टि हुन सकेको छैन । युक्रेनले पनि हालसम्म रुसको भूमिमा आक्रमण गरेको जिम्मेवारी नलिएको बीबीसीले जनाएको छ ।
