२६ जेठ, काठमाडौं । एएफसी एसियन कप २०२३ को अन्तिम चरणको छनोटको पहिलो खेलमा नेपाल जोर्डनसँग २-० ले पराजित भएको छ ।
समूह ए अन्तर्गत कुवेतको जाबिर अल अहमद स्टेडियममा बुधबार राति भएको खेलमा नेपालले दुवै गोल दोस्रो हाफमा खाएको थियो । जोर्डनले अन्तिम २१ मिनेटमा दुई गोल गरेको थियो ।
जोर्डनसँग नेपाल पराजित भएको यो चौथो पटक हो । अहिलेसम्मको पाँच भेटमा नेपालले जोर्डनलाई एक पटक मात्र बराबरीमा रोक्न सकेको छ ।
यसै खेलमार्फत राष्ट्रिय टिममा डेब्यु गरेका गोलकिपर दिप कार्कीले उत्कृष्ट प्रदर्शन गरे पनि नेपालले हार रोक्न सकेन । दिपले पहिलो हाफमा पेनाल्टी बचाएका थिए । तर दोस्रो हाफमा जोर्डनले अर्को पटक पेनाल्टी पाउँदा गोल गर्यो ।
जितपछि जोर्डनले ३ अंक जोड्दा नेपालले हारबाट सुरुवात गरेको छ ।
