चुनाव जित्न कानुनले तोकेभन्दा बढी खर्च गरेको मुद्दामा फ्रान्सका पूर्वराष्ट्रपति निकोलस सार्कोजी दोषी ठहर भ

चुनाव जित्न कानुनले तोकेभन्दा बढी खर्च गरेको मुद्दामा फ्रान्सका पूर्वराष्ट्रपति निकोलस सार्कोजी दोषी ठहर भएका छन्।

सन् २०१२मा भएको राष्ट्रपतीय निर्वाचनमा सार्कोजीले चुनाव जित्न कानुनले तोकेभन्दा बढी रकम खर्चे गरेको भन्दै बिहीबार पेरिसको एक अदालतले उनलाई दोषी ठहर गरेको समाचार संस्था रोयटर्सले जनाएको छ। सार्कोजीले सन् २०१२मा भएको चुनाव जितेका भने थिएनन्।

सार्कोजी योसँगै दुई वटा मुद्दामा दोषी ठहरिसकेका छन्। उनी सन् २००७ देखि २०१२ सम्म फ्रान्सका राष्ट्रपति थिए।

अदालतले उनलाई सजाय भने तोकिसकेको छैन। उनलाई एक वर्षको कैद सजाय तोकिन सक्ने अनुमान गरिएको छ।

यो मुद्दामा अदालतले दोषी ठहर्‍याए पनि सार्कोजीले अहिलेसम्म कानुनभन्दा बढी खर्च गरेको स्वीकारेका छैनन्। गत जुनमा उनले अदालतमा यसमा आफ्नो संलग्नता नरहेको बयान दिएका थिए।

सन् २०१२को राष्ट्रपतिको चुनावी अभियानमा पहिलो चरण प्रत्येक उम्मेद्वारले एक करोड ६८ लाख युरो र दोस्रोमा ५७ लाख युरोसम्म खर्चिन पाउने नियम रहेको द न्युयोर्क टाइम्सले जनाएको छ।

सार्कोजीले आफ्नो चुनावी अभियानमा खर्च गर्न पाउनेभन्दा दोब्बर खर्चेको आशंका गरिएको थियो। त्यसपछि सन् २०१४मा अभियोजनकर्ताले अनुसन्धान थालेका थिए।

अभियोजनकर्ताहरूले गरेको अनुसन्धानबाट पूर्व राष्ट्रपति सार्कोजीले कम्तिमा पनि ४ करोड २० लाख युरो खर्च गरेको खुलेको थियो।

गत मार्चमा सार्कोजी अर्को मुद्दामा पनि दोषी ठहर भएका थिए। न्यायीक छानविनको गोप्य सूचना पाउन न्यायाधीशलाई घुस दिन खोजेको घटनामा उनी दोषी ठहरिएका हुन्।

त्यसमा पनि उनले आफ्नो गल्ती स्वीकारेका थिएनन्। उनलाई अदालतले तीन वर्ष जेल सजायसमेत सुनाएको थियो। जसमा दुई वर्ष कैद मिनाहासमेत गरिएको थियो।

यद्यपी उनी अहिलेसम्म जेलमा बसेका छैनन्।