२९ चैत्र, जनकपुर । नेकपा एमालेले प्रदेश २ को संसदीय दलको नेतामा सत्यनारायण मण्डललाई हटाएर शत्रुधन महतोलाई चयन गरेको छ । नेकपा एमालेका नेता माधवकुमार नेपाल– झलनाथ खनाल पक्षले प्रदेश– २ को संसदीय दलको नेतामा महतोलाई चयन गरेको हो ।
प्रदेश सभा संसदीय दलको कार्यालयमा बसेको माधव–झलनाथ पक्षको संसदीय दलको बैठकबाट दलको नेताबाट सत्यनारायण मण्डललाई हटाएर महतोलाई नयाँ नेता चयन गरेको प्रदेश सभा सदस्य मञ्जु यादवले जनाइन् ।
प्रदेशसभा सदस्य यादवले बैठकमा ११ जना सांसदको उपस्थिति रहेको र २ जना बिरामी भएका कारण नआए पनि उनीहरुको पनि हस्ताक्षरसहित मण्डललाई हटाएर महतोलाई चयन गरिएको बताइन् ।
प्रदेशसभा सदस्यद्वय गोविन्द न्यौपाने र डिल्ली उप्रेती बिरामी भएका कारण बैठकमा उपस्थित हुन सकेनन् । प्रदेश २ मा २१ जना प्रदेश सभा सदस्य मध्ये माधव–झलनाथ पक्षसँग १३ जना छन् । माधव–झलनाथ पक्षले कारबाही गरेको मण्डल नेकपा एमाले अध्यक्ष केपी शर्मा ओली निकटका हुन् ।
सो बैठकले उपनेतामा रवीन्द्र बैठा, प्रमुख सचेतकमा सुन्दर विश्वकर्मा र बेची लुंगेलीलाई चयन गरेको प्रदेशसभा सदस्य यादवले जनाकारी दिइन् ।
नेकपा एमालेभित्रको आन्तरिक विवादका कारण माधव–झलनाथ पक्षले देशभर वडा, जिल्ला, प्रदेश, केन्द्र समानान्तर कमिटी बनाउन थालेको छ ।